Ibi byabaye mu mukino Maroc yatsinzemo Tanzania ibitego 3-0, mu mukino wa mbere wo mu Itsinda F mu Gikombe cya Afurika.

Ku munota wa 80, Achiraf Hakim yazamukanye umupira neza awuhindura imbere y’izamu, usanga Youssef En-Nesyri atsinda igitego cya gatatu ku munota wa 80.

Byafashe umwanya munini umusifuzi asubiramo amashusho kuri Video Assistant Referee (VAR), abona kucyemeza.

Muri uwo mwanya wo kucyemeza, Umutoza w’Ikipe y’Igihugu ya Maroc, Walid Regragui yahise akora impinduka, asimbuza abakinnyi batatu aribo En-Nesyri wari umaze gutsinda igitego, Azzedine Ounahi na Hakim Ziyech.

Umusifuzi yaje kwemeza igitego uyu rutahizamu yamaze kwicara ku ntebe y’abasimbura, aba ariho bagenzi be bamusanga baracyishimira.

Abafana b’Ikipe y’Igihugu ya Maroc batangajwe n’ibyabaye maze bandika ku mbuga nkoranyambaga bagaragaza ko batunguwe.

Uwa mbere yagize ati “En-Nesyri umukinnyi wa mbere utsinze igitego ari ku ntebe y’abasimbura.”

Uwa kabiri yunze mu rye aseka agira ati “En-Nesyri yishimiye igitego ari ku ntebe y’abasimbura.”

Iki gitego cyaje gikurikira ibindi bya Kapiteni Romain Saïss yatsinze ku munota wa 30 ndetse n’icya Azzedine Ounahi cyabonetse ku munota wa 77.

Maroc iri mu makipe ahabwa amahirwe yo kwegukana iri rushanwa, izasubira mu kibuga ku Cyumweru, tariki 21 Mutarama 2024 ikina na Repubulika Iharanira Demokarasi ya Congo saa kumi.