Muri iri rushanwa ikipe ya Machester United yahise isezererwa isanze andi makipe akomeye nka Chelsea, Arsenal na Tottenham, yamaze kuvamo rugikubita atabashije no kugera muri ¼.
Ku mukino wo ku mugoroba, umutoza Louis Van Gaal wari wagerageje kuzanamo abakinnyi bakiri bato yatunguwe no kubona iminota 90 y’umukino irangira anganyije n’ikipe yo mu cyiciro cya kabiri ubusa ku busa, imbere y’abafana Old Trafford.
Iminota 30 y’inyongera nayo yarangiye nta gitego kibonetse, maze kuri penalite umwana ukiri muto Pereira aba ari we wenyine winjiza penalite abandi bose harimo na Kapiteni Wayne Rooney, barazihusha basezererwa kuri penalite 3-1.
Ikipe ya Liverpool yabonaga intsinzi ya mbere iri mu maboko ya Jurgen Klopp kuko imikino ibiri yari amaze gukina yose yari yayinganyije.
Nyuma yo gutsinda Bournemouth igitego kimwe rukumbi cya Nathaniel Clyne cyo ku munota wa 17 cyatumye Liverpool ikomeza muri ¼, umutoza yagize ati:” Noneho ndishimye kuba mbonye intsinzi ya mbere muri iyi kipe. Ariko cyane nishimiye uburyo abana bakiri bato bitwaye, biratanga icyizere kuri ejo hazaza hacu.”
Ikipe yakomeje ni Manchester City yanyagiye ibitego 5-1 Crystal Palace yo mu cyiciro cya mbere. Ni umukino umwana muto ukomoka muri Nigeria; Kelechi Iheanacho yigaragajemo cyane atsinda igitego, atanga n’imipira ibiri ivamo ibindi.
Ibitego bya Manchester City byatsinzwe na Wilfried Bony, De Bruyne, Kelechi Iheanacho, Yaya Toure na Manuel Garcia. Nyuma y’umukino, umutoza yavuze ko ikimushimishije kurenza ibindi ari uburyo Iheanacho yitwaye. Yemeza ko ari umukinnyi ndashidikanyaho kandi afite byinshi byo kwerekana.”
Uko imikino yose yagenze
Liverpool 1-0 Bournemouth
Manchester City 5-1 Crystal Palace
Southampton 2-1 Aston Villa
Manchester United 0-0 Middleborough (penaliti 1-3)
Uko amakipe yakomeje azahura muri ¼
Middlesbrough vs Everton
Southampton vs Liverpool
Stoke City vs Sheffield Wednesday
Manchester City vs Hull City
TANGA IGITEKEREZO