Kuri uyu wa Kabiri tariki 22 Mata 2014, imikino ibanza ya 1/2 y’amakipe yabaye aya mbere iwayo irkomeza. Umukino uza guhuza uhuza Chelsea yo mu Bwongereza na Atletico Madrid yo mu gihugu cya Espagne.

Ikipe ya Atletico Madrid irakira umukino ubanza kuri sitade yayo Vicente Cardelon, ikaba yarageze muri iki cyiciro nyuma yo gusezerera ikipe ya Fc Barcelona zituruka mu gihugu kimwe iyitsinze ibitego 2-1 mu mukino ubanza n’uwo kwishyura.

Ku rundi ruhanse, Chelsea ari nayo kipe bari buhangane uyu munsi yageze muri iki cyiciro ikuyemo Paris saint Germain yo m ugihugu cy’ u Bufaransa ku bitego bitatu 3-3 mu mikino yombi. Gusa, Chelsea yari yatsinze igitego cyo hanze aba ari cyo kiyihesha amahirwe yo gukomeza.

Umukino w’uyu munsi, ntiworoshye dore ko aya makipe yombi ahagaze neza mu bihugu akomokamo. Ikipe ya Atletico Madrid iri bwakire uyu mukino, kugeza ubu niyo iyoboye urutonde rwa Shampiyona ya Espagne, La Liga n’amanota 85 ikaba inafite amahirwe menshi yo kwegukana igikombe. Chelsea, kugeza kuri uyu munsi iri ku mwanya wa kabiri mu gihugu cy’u Bwongeleza n’amanota 75 inyuma ya Liverpool iyoboye urutonde n’amanota 80.

Amakipe yombi agiye guhura mu gihe mu mpera z’iki cyumweru yakinnye imikino ya shampiyona z’iwabo aho ikipe ya Chelsea yaje gutungurwa na Sunderland iyitsinda ibitego 2-1 ku kibuga cyayo, Stamford Bridge. Ikipe ya Atletico yo yabashije kwitwara neza mu mukino wayo yakinnye kuwa Gatanu ubwo yatsindaga ikipe ya Elche ibitego 2-0.

Mu mikino itanu iheruka ikipe ya Atletico Madrid imaze gukina mu mikino itandukanye yatsinzemo ine yose inganya umwe. Mu gihe ikipe ya Chelsea mu mikino itanu iherutse gukina yatsinzemo itatu, itsindwa ibiri.

Umukino uherutse guhuza aya makipe wabaye tariki ya 31 Kanama 2012 ikipe ya Atletico Madrid itsinda Chelsea ibitego 4-1, ubera i Monaco mu gihugu cy’ u Bufaransa. Wari umukino uhuza ikipe yatwaye Champions League n’iyatwaye Europa League ku mugabane w’u Burayi. Ikipe ya Chelsea ikaba ishakisha uburyo yagera ku mukino wa nyuma w’iri rushanwa kunshuro yayo ya gatatu mu myaka irindwi ishize.

Umutoza José Mourinho wa Chelsea mu nshuro enye yahuye na Diego Simeone yabashije kumutsindamo eshatu zose , icyo gihe yatozaga ikipe ya Real Madrid, gusa Atletico Madrid yaherukaga muri iryo rushanwa mu mwaka 1996 ikaba ihagaze neza ku mugabane w’u Burayi.

Mu bakinnyi bataza kugaragara ku ruhande rwa Chelsea hakaba harimo Samuel Eto’o wavunitse na Ivanovic wahawe amakarita 2 y’umuhondo. Abakinnyi barimo Diego Costa aragaragara kuri uyu mukino n’umunyezamu Tibaut Courtois ameze neza nk’uko byemejwe na UEFA n’ubwo ari intizanyo ya Chelsea.