Ikipe ya Real Madrid iraba yagaruye abakinnyi bayo babiri bari bafite ibibazo by’imvune; James Rodriguez ndetse na Kapiteni Serigio Ramos, ariko rutahizamu Benzema na Gareth Bale baracyashidikanywaho ku buryo bashobora kudakina.

Mu mukino uheruka, aya makipe yanganyije ubusa ku busa mu Bufaransa mu byumweru bibiri bishize. Yombi anganya amanota ntaratakaza umukino n’umwe.

Umutoza Benitez watwaranye iki gikombe cya Champions League na Liverpool mu 2005, yavuze ko n’ubwo ikipe ye imaze iminsi yitwara neza bagomba kwitanga cyane kuko ikipe bakina nayo ikomeye cyane.

Ati: ”Ndabizi tumaze iminsi twitwara neza ariko hari ibyo bagomba kongeramo imbaraga igihe duhatanira ibikombe. Dufite ikipe nziza kandi ibyiza biracyaza.”

Naho kuri Manchester United, umutoza Van Gaal yavuze ko kuri uyu mukino, umukinnyi Anthony Martial ari we uyobora ubusatirizi umwanya wari usanzwe ukinwaho na Kapiteni Rooney.

Kuri Manchester City igitegerejwe cyane ni ukongera kuvugiriza induru indirimbo yubahiriza iri rushanwa nk’uko babikoze ubwo aya makipe yahuraga Etihad Stadium ibintu iyi kipe yanahaniwe, ariko yaba umutoza Manuel Pellegrini ndetse na Kapiteni Vincent Kompany bakaba batangaje ko bashyigikiye abafana babo.

Ibi byatewe n’igihano cyahawe ikipe ya CSKA umwaka ushize ku mukino bakinaga na Manchester City cyo gukina nta mufana urimo kubera ironda ruhu, ibintu byababaje abafana ba Manchester City bari baherekeje ikipe ariko bakabuzwa kureba umukino.

Imikino iba kuri uyu wa Kabiri:
Real Madrid vs PSG
Man United vs CSKA
Sevilla vs Man City
Shakt Donsk vs Malmo FF
PSV Eindhoven vs Vfl Wolfsburg
FC Astana vs Atl Madrid
Benefica vs Galatasaray
B M’gladbach vs Juventus