Uyu mukino wari utegerejwe na benshi dore ko Real Madrid ari ikipe ifite amateka muri iri rushanwa ndetse by'umwihariko ikaba ari yo ifite igikombe giheruka.

Ku rundi ruhande, Manchester City ni ikipe ikomeye i Burayi muri uyu mwaka w'imikino ndetse benshi bayiha amahirwe cyane ko ishobora kwegukana iri rushanwa.

Iminota 15 ibanza yaranzwe no gusatira kw'iyi kipe yo mu Bwongereza aho yabonye uburyo bubiri bukomeye, ariko imipira yatewe na Kevin De Bryune ndetse na Rodrigo Hernández, yombi ishyirwa muri koruneri n'Umunyezamu Thibaut Courtois.

Byasabye gutegereza umunota wa 36 kugira ngo Real Madrid ifungure amazamu ku gitego cyinjijwe na Vinícius Júnior ku ishoti rikomeye yatereye ahagana ku murongo w'urubuga rw'amahina nyuma yo guherezwa na Edouardo Camavinga wari ukananye neza na Luka Modrić.

Bitandukanye n'igice cya mbere cyihariwe na Manchester City, mu cya kabiri Real Madrid ni yo yayoboye umukino ariko uburyo bw'ingenzi buboneka ku ruhande rw'abashyitsi.

Kevin De Bruyne yabaye umucunguzi wa Manchester City ubwo yatsindaga igitego cyo kwishyura ahawe umupira na Ilkay Gündogan ku munota wa 67, atera ishoti rikomeye ari inyuma y'urubuga rw'amahina.

Mu minota 13 ya nyuma, Real Madrid yabonyemo uburyo bubiri bwiza, ariko igorwa n'Umunyezamu Ederson Moraes wakuyemo imipira yatewe na Karim Benzema ndetse na Aurélien Tchouaméni.

Iminota 90 yarangiye amakipe yombi anganyije uyu mukino wabereye imbere y'abasaga ibihumbi 63, asigara ategereje umukino wo kwishyura uzabera mu Bwongereza mu cyumweru gitaha, tariki ya 17 Gicurasi.

Undi mukino wa ½ urahuza Milan AC na Inter Milan zo mu Butaliyani kuri uyu wa Gatatu, tariki ya 10 Gicurasi, saa Tatu z'ijoro.

Abakinnyi 11 ba Real Madrid babanje mu kibuga: Courtois; Carvajal, Rüdiger, Alaba, Camavinga; Modric, Kroos, Fede Valverde; Rodrygo, Benzema na Vinicius.

Abakinnyi Manchester City yari yabanje mu kibuga: Ederson; Walker, Stones, Rúben Dias, Akanji; De Bruyne, Rodri, Gündogan; Bernardo Silva, Haaland na Grealish.