Uruzinduko itsinda rizagenzura imyiteguro y’igikombe cy’Afurika cy’abakinira imbere mu gihugu (CHAN) ryagombaga gukorera mu Rwanda mu Ukuboza ryimuriwe muri Werurwe 2015 ngo habanze havugururwe stade Umuganda na Stade ya Kigali zizakinirwaho iki gikombe.

U Rwanda ruzakira CHAN mu 2016 ikinirwe kuri stade Amahoro, stade ya Kigali (Nyamirambo), Umuganda (Rubavu) na Huye.

Ibi iri tsinda (Local Organising Committee (LOC) ryabisabye Nzamwita Vincent, Umuyobozi w’Ishyirahamwe ry’umupira w’amaguru mu Rwanda mu nama ngarukamwaka y’abanyamuryango b’Ishyirahamwe ry’umupira w’amaguru muri Afurika (CAF).

Igice kidatwikiriye cya stade ya Kigali i Nyamirambo nacyo gishobora kongerwa

Nyamirambo: Igice gitwikiriye gishobora kongerwa umwanya uri inyuma ukubakwa

Aganira na IGIHE, Nzamwita yavuze ko iri tsinda ryagombaga kuza mu Rwanda mu Ukuboza 2014 ariko basabye ko byimurirwa muri Werurwe 2015 kugira ngo na stade zindi zizakira iyi mikino zivugururwe.

Yagize ati “ Igenzurwa ryo mu Ukuboza ryimuriwe muri Werurwe kugira ngo nibura bazasange hari ibimaze gukorwa. Kuvugurura stade Umuganda n’iya Kigali (Nyamirambo) ntibiratangira ariko inyigo ziri gukorwa bishobora gutangira mbere y’uko uyu mwaka urangira.”

Biteganyijwe ko stade ya Kigali izongererwa ubushobozi hubakwa igice kiri inyuma y’ahatwikiriye n’igice cy’abafana kireba kuri Tapis rouge.

Aya ma stade (Umuganda na Kigali) yaherukaga kuvugururwa mu 2011 ubwo u Rwanda rwakiraga igikombe cy’Afurika cy’abatarengeje imyaka 17.

Mu 2011 stade Umuganda yari yavuguruwe u Rwanda twakira igikombe cy'Afurika U17

Stade Umugana izongerwamo ibyangombwa bituma ijya ku rwego mpuzamahanga nk'amatara n'ibindi

Ubwo Minisitiri w’umuco na siporo, Habineza Joseph yasuraga stade Huye imaze imyaka itatu yubakwa yari yemerewe na Rwiyemezamirimo ko kubaka igice cya kabiri bizaba byarangiye mu Ugushyingo mu gihe byari giteganyijwe ko igenzura rya CAF rizaba mu Ukuboza.

Kayiranga Muzuka Eugene, Umuyobozi w’akarere ka Huye yari yavuze ko hazakurikiraho kubaka igice cya gatatu cyo kunoza bimwe mu bizatuma iyi stade ijya ku rwego mpuzamahanga ikemererwa kwakira CHAN 2016.

Bivuze ko abakora igenzura bazasanga kubaka igice cya gatatu cy’iyi stade kigana ku musozo kuko igomba kubanza gukinirwaho mbere yo kwakira CHAN ishobora kuba hagati ya Mutarama na Gashyantare 2016.

Igice cya kabiri: Stade Huye igomba kuba yabonetse mu Ugushyingo nkuko byasezeranijwe Minisitiri Habineza

Mu Ukwakira LOC izajya muri Afurika y’Epfo kwigira hamwe n’Ishyirahamwe ry’umupira w’amaguru ryaho riheruka kwakira iyi mikino muri Mutarama 2014 ibisabwa ngo u Rwanda rwakire neza iri rushanwa.

Mu 2014 CHAN yabereye muri Afurika y’Epfo yitabirwa n’amakipe 16, Libya itsinda Ghana ku mukino wa nyuma. Iyi mikino yarebwa n’abantu (binjiye muri stade) 296,440.