Iri tsinda ryagaragaje ko ririmo ba rutahizamu bakomeye kuko mu mukino wabanje, ibitego bibiri bya Tunisia byatsinzwe n’umukinnyi umwe, Ahmed Akaichi ndetse bikaba ari nako bigenda ku ruhande rwa Guinea yishyuye binyuze ku mukinnyi Alseny Camara.

Tunisia yigeze gutwara iki gikombe cya CHAN mu 2011 yabereye muri Sudan, ni imwe mu zihabwa amahirwe cyane kuba yakwegukana n’iki kirimo kubera mu Rwanda, ntiyahiriwe n’umukino wa mbere mu itsinda kuko yishyuwe na Guinea mu minota ya nyuma mu gihe abafana bayo bari batangiye kuririmba intsinzi.

Ahmed Akaichi, niwe wafunguye amazamu ku ruhande rwa Tunisia ku munota wa 32 w’umukino nubwo Guinea ariyo yari yakomeje kugera imbere y’izamu cyane.

Ku munota wa 39, Alseny Camara wari wagiye ahusha uburyo bwabazwe yahise yishyura ku ruhande rwa Guinea igice cya mbere kirangira ari igitego kimwe kuri kimwe.

Mu gice cya kabiri, Tunisia yabonye igitego cya kabiri ku munota wa 50 binyuze kuri Akaichi wari watsinze n’icya mbere.

Guinea yagaragaje kudacika intege na nyuma yo gutsindwa ikomeza guhanahana neza nubwo Tunisia nk’ikipe ikomeye itayoroheraga, ku munota wa 82 Camara yahagurukije abafana bake ba Guinea bari ku kibuga atsinda igitego cya kabiri ari nako umukino warangiye.

Hakurikiyeho umukino wa kabiri mu itsinda wahuje Nigeria na Niger wari uryoheye ijisho, ndetse ku mpande zombi urangira habonetsemo ibitego bitanu ari nawo wa mbere urumbutsemo ibitego kuva CHAN yatangira.

Super Eagles,ikipe y’igihugu ya Nigeria yihereranye umuturanyi wayo imuhambirira impamba y’ibitego bine kuri kimwe, harimo bitatu bya rutahizamu Chisom Chikatara, wari winjiye mu kibuga asimbuye ku munota wa 52.

Igice cya mbere cyarangiye ari ubusa ku busa ku mpande zombi, ariko nyuma y’amasegonda 32 gusa y’ igice cya kabiri Nigeria ifungura amazamu ku gitego cya Oas Okoro ku mupira yari ahawe na Tunde Adeniji.

Chikatara yaje gutsinda igitego cya kabiri ku mupira yari ahawe na Okoro ku munota wa 58, Niger itangira gusatira ishaka kwishyura birayihira ku munota wa 81 Adebayor Zakarie Adje atsinda igitego cya mbere ariko mu gihe bari bakicyishimira nyuma y’umunota umwe gusa, Chisom Chikatara abatsinda icya gatatu ndetse ku munota wa 90 Chikatara ashyiramo icya kane ari n’icya gatatu cye.

Chikatara niwe uyoboye ba rutahizamu bamaze gutsinda ibitego byinshi muri CHAN aho afite bitatu, Alseny Camara wa Guinea na Ahmed Akaichi wa Tunisia bafite bibibi bibiri naho Lusadisu, Luvumbu na Munganga ba RDC, Emery Bayisenge w’u Rwanda na Emane Yazid Atouba wa Cameroun bafite igitego kimwe buri wese.