Kuwa Gatandatu tariki 20 Kanama 2022, shampiyona y’u Bwongereza na Ligue 1 mu Bufaransa hakinwaga umunsi wa gatatu.

Bigoranye cyane Manchester City yanganyije na Newcastle ibitego 3-3.

Mu gihe Chelsea yanyagiwe na Leeds United yayitsinze ibitego 3-0, Koulibaly ahabwa umutuku.

Arsenal yatangiye neza uyu mwaka yatsinze Bournemouth ibitego 3-0 byatsinzwe na Martin Odeggard na William Saliba.

Arsenal yujuje umukino wa gatatu itsinda mu ntangiriro za shampiyona, ibintu yaherukaga gukora mu 2004.

Crystal Palace yaherukaga kunganya na Liverpool yatsinze Aston Villa ibitego 3-1.

Bigoranye Tottenham yatsinze Wolves igitego 1-0 cya Harry Kane.

Kuri uyu wa Mbere hateganyijwe Derby y’u Bwongereza, Manchester United irakira Liverpool saa Tatu z’ijoro.

Aya makipe yombi nta n’imwe iratsinda umukino muri shampiyona y’uyu mwaka, nyamara Liverpool iri muzihabwa amahirwe yo kwegukana igikombe cya shampiyona uyu mwaka.

Shampiyona y’u Bufaransa Ligue 1 nayo yakomezaga, Amatsiko yari menshi yo kureba uko Paris Saint Germain iritwara nyuma y’umwuka mubi wari umaze iminsi uvugwa hagati ya Mbappe na Neymar kubera kwimana penaliti ku mukino uheruka wa Montpellier.

Mu kiganiro n’itangazamakuru mbere y’umukino wa Lille umutoza Christopher Gartier, yavuze ko yaganirije aba basore, anashimangira ko uwa mbere utera penaliti ari Mbappe, Neymar agakurikira.

Ni umwanzuro watanze umusaruro kuko muri uyu mukino abasore bombi bagaragaje ubufatanye dore ko imipira ibiri yavuyemo ibitego bya nyuma Mbappe yatsinze yayihawe na Neymar.

Iyi kipe yaje kwitwara neza inyagira Lille ibitego 7-1. Harimo ibitego bitatu bya Mbappe, bibiri bya Neymar, Hakimi na Messi.

Marseille yatsinze Nante ibitego 2-1, kapiteni wayo Dimitri Payet yuzuza imikino 300 akinira iyi kipe.

La Liga shampiyona ya Espagne yo yakomezaga ku munsi wayo wa kabiri, Real Madrid ikomereza aho yasoreje umwaka ushize itsindira Celta Vigo iwayo ibitego 4-1, harimo igitego cya Benzema na Vinicius.

Barcelona nayo yatsinze Real Sociedad ibitego 4-1, harimo ibitego bibiri bya rutahizamu mushya Robert Lewandowski, Dembele na Ansufati.

Atletico Madrid yatsindiwe iwayo na Villareal ibitego 2-0.

Bundesliga shampiyona y’u Budage nayo yakomezaga, yatangiye Dortmund yishyurwa bitunguranye na Werder Bremen iza no kuyitsinda ibitego 3-2.

Bayern Munich idapfa guhagarikwa muri iyi shampiyona yanyagiye Bochum ibitego 7-0, harimo bibiri bya Sadio Mane rutahizamu mushya iyi kipe iheruka kugura muri Liverpool.

Mu Butaliyani Inter Milan yitwaye neza itsinda Spezia ibitego 3-0, AC Milan inganya na Atalanta 1-1. Mugihe Napoli yo yatsinze Monza ibitego 4-0.

Kuri uyu wa Mbere, Juventus irasura Sampdoria saa 20:45, Roma ya Mourihno yakire Cremonese saa Kumi n’Ebyiri n’igice.

Izi shampiyona zose zizagaruka mu mpera z’icyumweru gitaha guhera tariki 26-28 Kanama 2022.