Kuri uyu wa Mbere, tariki ya 16 Werurwe 2026, ni bwo Shampiyona y’u Bwongereza yashyize hanze ubutumwa bwerekana ibihano byafatiwe Chelsea ku byaha yakoze hagati ya 2011 na 2018.

Itangazo rigira riti “Premier League yafashe umwanzuro ku bihano by’imyitwarire bifitanye isano na Chelsea FC, nyuma y’uko yo ubwayo igaragaje amakosa yakoze ikarenga ku mategeko.”

“Komisiyo yigenga yemeje ko Chelsea FC yemeye kwishyura miliyoni 10,75 z’Amapawundi (20.837.101.250 Frw) kuko yishe amategeko ya Premier League mu kugaragaza umutungo wayo, ibigo biyishamikiyeho n’iterambere ry’abakiri bato.”

Premier League yongeyeho ko Chelsea igomba kumara amezi icyenda itagura umukinnyi wo mu ikipe y’abato, n’ikindi gihano cyo kumara umwaka umwe usubikiye mu myaka ibiri itagura abakinnyi b’ikipe nkuru.

Mu 2022 iyi kipe yavuye mu maboko ya Roman Abramovich ayigurishije ku gahato kubera gushinjwa gukorana bya hafi na Vladimir Putin uyobora u Burusiya wagabye ibitero kuri Ukraine.

Icyo gihe yafashwe na Todd Boehly, ari na we wagaragaje ko iyi kipe yakoze amanyanga mu kugura no kugurisha abakinnyi mu myaka yari yabanje, rimwe na rimwe hakifashishwa n’ibigo bitabaho kugira ngo iyi kipe itagongwa n’itegeko rigenga ikoreshwa ry’umutungo muri Premier League.

Chelsea yahawe ibihano biyisanze mu bihe bibi byo kutabona intsinzi bihoraho muri Shampiyona y’u Bwongereza, dore ko iri ku mwanya wa gatandatu n’amanota 48.