Ubuyobozi bw’impuzamashyirahamwe y’umupira w’amaguru muri Afurika CAF bwakoze impinduka nyinshi mu bihugu byagombaga kwakira igikombe cya Afurika.

Nyuma yo kwambura Cameroun kwakira CAN ya 2019 igasimburwa na Misiri, Cameroun yahise yemererwa kwakira igikombe cya Afurika kizakurikiraho mu 2021 ariko habaho kutumvikana hagati ya CAF n’ubuyobozi bw’umupira w’amaguru muri Côte d'Ivoire kuko aricyo gihugu cyari cyaratangiye kwitegura kwakira iki gikombe mu 2021.

CAF yasabye Minisiteri y’imikino n’ishyirahamwe ry’umupira w’amaguru muri Côte d'Ivoire kwemera guhindurirwa ikazakira igikombe cya Afurika mu 2023 ariko ntiyabyemera, ahubwo yandikira urukiko ruca imanza z’imikino (Court of Arbitration for Sport) isaba kurenganurwa.

Iki kibazo cyakemutse bisabye ko Umuyobozi wa CAF, Ahamd Ahmad ajya muri Côte d'Ivoire aho yahuriye na Perezida w’iki gihugu Alassane Dramane Ouattara mu nama yabaye kuri uyu wa Kabiri tariki 29 Mutarama 2019.

Perezida Ouattara yavuye ku izima yemera ko bahindurirwa bakakira igikombe cya Afurika cya 2023.

Uko ibikombe bya Afurika bizakirwa

 Misiri (2019)
 Cameroun (2021)
 Côte d'Ivoire (2023)
 Guinée-Conakry (2025)