Juventus yakiriye uyu mukino w’umunsi wa 36 isabwa byibuze inota rimwe kugira ngo yizere kwegukana igikombe, kuko yarushaga Inter Milan ya kabiri amanota atandatu.

Kuri Allianz Stadium Juventus yakiriraho imikino, rutahizamu wayo Paulo Dybala yavunitse hakiri kare, asimburwa na Gonzalo Higuain ku munota wa 40.

Byasabye Juventus gutegereza umunota wa karindwi w’inyongera mu gice cya mbere, ifungura amazamu ku gitego cyatsinzwe na Cristiano Ronaldo.

Ku munota wa 67 w’igice cya kabiri nibwo Federico Bernardeschi yatsindiye Juventus igitego cya kabiri gishimangira intsinzi no kwegukana igikombe cya Shampiyona y’uyu mwaka, mu gihe hasigaye imikino ibiri.

Juventus yababaye ikipe ya gatatu yo mu Burayi itwaye igikombe cya shampiyona inshuro icyenda zikurikirana. Andi makipe yabigezeho ni Celtic Glasgow yo muri Écosse na Ludogorets Razgrad yo muri Bulgarie.

Cristiano Ronaldo yujuje ibitego 32 byatumye akomeza guhatanira urukweto rwa zahabu ruhabwa umukinnyi watsinze ibitego byinshi mu mwaka w’imikino umwe muri shampiyona eshanu zikomeye i Burayi.

Aramutse yegukanye icyo gihembo, yaba ari we mukinnyi wa mbere wa Juventus ucyegukanye kuva Alessandro del Pierro agitwaye mu mwaka w’imikino wa 2007/08.

Muri Shampiyona eshatu zikomeye amaze gukinamo, Cristiano Ronaldo yatsinze ibitego 84 mu mikino 196 yakiniyemo Manchester United muri Premier League, ibitego 311 mu mikino 292 yakiniyemo Real Madrid muri La Liga n’ibitego 53 mu mikino 62 amaze gukiniramo Juventus muri Serie A.

Juventus yatsinze Sampdoria ibitego 2-0, yegukana igikombe cya Shampiyona y'Icyiciro cya Mbere mu Butaliyani ku nshuro ya cyenda yikurikiranya