Cristiano Ronaldo yongeye Igikombe cya Shampiyona ya Arabie Saoudite ku bigwi bye

00:00:00 IGIHE NETWORK

KINYARWANDA

ENGLISH

FRANCAIS

Cristiano Ronaldo yongeye Igikombe cya Shampiyona ya Arabie Saoudite ku bigwi bye

Yanditswe na Iradukunda Olivier

Kuya 22 May 2026 saa 12:03

Yasuwe :

Yavuzweho:

Umunyabigwi mu mupira w’amaguru, Cristiano Ronaldo, yegukanye Igikombe cya Shampiyona ya Arabie Saoudite ku nshuro ya mbere ari muri Al Nassri, acyongera ku bindi bigwi afite muri ruhago.

Mu 2022 ni bwo Ronaldo yageze muri Al Nassr yo muri Saudi Pro League, aho yagombaga gufatanya na yo, akayihesha igikombe cy’iyi shampiyona baherukaga mu mwaka w’imikino wa 2018/19.

Akihagera ntabwo byamukundiye ko acyegukana, ndetse akenshi yakunze gutangaza ko ikomeye kurusha aho yari yaranyuze i Burayi mu Bwongereza no muri Espagne. Igikombe yatwaye ni icya Arab Club Champions Cup yatwaye mu 2023.

Mu ijoro ryo ku wa Kane, tariki ya 21 Gicurasi 2026, yakuyeho aya mateka mabi ubwo bakinaga na Damac bakayitsinda ibitego 4-1, mu mukino w’Umunsi 34 wa Saudi Pro League.

Ibitego byatsinzwe kuri uyu munsi, harimo icya Sadio Mane cyagiyemo ku munota wa 33, icya Kingsley Coman ku munota wa 51, na bibiri bya Cristiano Ronaldo ku munota wa 62 n’uwa 80.

Gutsinda uyu mukino byayihesheje amanota 86, irusha amanota abiri Al Hilal SC bihanganye, nubwo na yo yatsinze Al Feiha igitego 1-0, ihita yegukana Igikombe cya 10 cya Shampiyona ya Arabie Saoudite (1975, 1980, 1981, 1989, 1994, 1995, 2014, 2015, 2019, 2026.

Al Nassr isoje umwaka itsinze imikino 28, inganya ibiri indi ine irayitsindwa. Cristiano Ronaldo yatsinze ibitego 28 muri 63 iyi kipe yinjije muri uyu mwaka wose.

Ibi byatumye uyu mukinnyi agira ibitego 973, mu rugendo rwe rwo kwandika amateka yo gutsinda ibitego 1000. Muri Saudi Pro League amaze gutsinda ibitego 102, mu gihe Al Nassr yayitsindiye ibitego 129.

Ronaldo w’imyaka 41 aheruka guhamagarwa mu Ikipe y’Igihugu ya Portugal izakina Igikombe cy’Isi cya 2026, kikazaba ari icya gatandatu akinnye mu mateka ye.

Uyu mukinnyi ufite Ballon D’Or eshanu yegukanye shampiyona eshanu z’aho yanyuze hose mu mupira w’amaguru. Yegukanye Shampiyona y’u Bwongereza inshuro eshatu ari kumwe na Manchester United, iya Espagne inshuro ebyiri ari kumwe na Real Madrid, iy’u Butaliyani inshuro ebyiri ari kumwe na Juventus.