Nyuma yo gutsindwa na Chili ibitego 2-0 mu gice cya mbere, Espagne ibaye ikipe ya 5 ifite igikombe cy’Isi isezerewe mu matsinda, mu itsinda B Chili n’u Buholande zabonye itike ya 1/8 .

Eduardo Vargas yatsinze igitego cya mbere ku munota 20 maze mbere yo kujya kuruhuka Charles Aranguiz atsinda igitego cya kabiri ku mupira wari ugaruwe ku rubuga na Iker Casillas umunyezamu wa Espagne.

Espagne yabonye amahirwe afatika abiri yo gutsinda igitego, umupira watewe na Diego Costa unyura inyuma y’izamu kimwe na Sergio Busquets wasigaye wenyine ananirwa guhindurira umupira mu izamu rya Chili.

Umutoza wa Espagne, Vicent Del Bosque yari yakoze impinduka akuramo Xavi Hernandez na Gerald Pique bari babanje ku mukino w’u Buholande abasimbuza Pedro Rodriguez na Javi Martinez wafatanyaga na Sergio Ramos mu mutima wa ba myugariro.

Mu gice cya mbere, Chili yahisemo gukina umukino wabo byatumye kugumana umupira ku ruhande rwa Espagne bisanzwe bimenyerewe bigabanuka. Espagne yagumanye umupira ku kigereranyo cya 56% kuri 44 ya Chili.

Mu mikino 7 Espagne yakinnye mu gikombe cy’Isi 2010 yarangije izigamye ibitego 6, uretse umukino wa Honduras yatsinzemo 2-0, indi byari 1-0 cyangwa ikinyuranyo cy;igitego kimwe.

Ni ku nshuro ya mbere kuva mu gikombe cy’Isi 1998 mu Bufaransa, Espagne isezerererwa mu matsinda.

Espagne ibaye ikipe ya 5 kuva igikombe cy’Isi gitangiye mu 1930,isezerewe mu matsinda ifite igikombe .

Nyuma yo gutwara igikombe cyo mu 1938, intambara ya kabiri y’Isi irangiye, u Butariyani bwasezerewe mu matsinda m 1950 muri Brazil.

Brazil itwara igikombe cyo mu 1962 ihita isezererwa rugikubitamu 1966 mu Bwongereza.

U Bufaransa butwara icyo mu 1998 butsinze Brazil ibitego 3-0, iyi kipe yasezerewe mu 2002 mu gikombe cyabereye mu Buyapani na Koreya y’Epfo idatsinze igitego na kimwe nyamara yari ifite n’igikombe cy’u Burayi cyyo mu 2000.

U Butariyani bwa kapiteni Fabio Cannavaro bwari bwatwaye igikombe cyo mu 2006 butsinze u Bufaransa kuri penaliti ntibahiriwe n’igikombe cya mbere cyabereye muri Afurika mu 2010.

Ubwo Espagne yatwaraga igikombe cy’u Burayi 2008 na 2012 kimwe n’icy’Isi 2010, yatsinzwe ibitego 6 gusa, ubu mu mikino ibiri imaze gutsindwa 7.

Espagne yaherukaga gutsindwa ibitego 2 cyangwa birengaho mu mukino umwe mu gikombe cyo mu 1994.

Imikino ya nyuma isoza iri tsinda izaba kuwa Mbere saa 18.00 u Buholande bukina na Chili naho Espagne izaba ishaka intsinzi ya mbere ihure na Australia izaba idafite Tim Cahill wabonye ikarita ya kabiri y’umuhondo.

[email protected]