Nyuma yo kunyagirwa n’u Buholandi ibitego 5-1, Espagne ya Vicente Del Bosque irasubira mu kibuga kubaka icyizere itsinda Chili niba ishaka itike ya 1/8 naho abakinnyi b’u Buholande basezeranyijwe gusurwa n’imiryango yabo nibatsinda Australia.

Australia vs u Buholande saa 18.00 @ Estadio Beira-Rio

U Buholande burachura na Australia idafite myugariro Ivan Franjic wagize imvune ku mukino wa Chili. Nta mvune umutoza wa Man United, Van Gaal afite, uretse ko kapiteni we,Robin Van Persie asabwa kwitonda kuko afite ikarita y’umuhondo yabonye ku mukino wa Espgane.

Nyuma yo gutsinda Espagne 5-1, uyu mutoza yaretse abagore n’abakobwa b’inshuti z’’abakinnyi binjira mu mwiherero w’ikipe, abana bongera kwizihirwa bongera gusaba na ba se.

Nyuma yo kunyagira Espagne, Abaholande bakoranye imyitozo n'imiryango yabo, Van Persie n'umukobwa we, Dina Layla

Arjen Robben watsinze ibitego bibiri Espagne ahanzwe amaso kuri Australia

Van Gaal ayasobanuye ko iyo abasore be bakoze akazi kabo neza nawe akishima aba agomba kubitura , yabasezeranije ko nibatsinda Australia imiryango yabo yongera kubasura

Yagize ati “ Utwara igikombe cy’Isi iyo utsinze umukino wa nyuma, ni intambwe ya mbere twateye, tugomba gukomeza gukora ntitwirare kuko tugomba kwemeza ko dushoboye ari uko dutsinze Australia.”

Tim Cahill, umunya Australia watsinze ibitego 3 mu bikombe by'Isi arayobora iki kirwa imbere y'u Buholande

Espagne vs Chili saa 21.00 @ Estadio do Maracanã

Nyuma yo gutsindwa 5-1 n’u Buholande, imyitozo ya mbere ya Espagne yakozwe gusa n’abatarakinnye, umutoza Del Bosque akorana inama y’iminota 15 n’abayobozi b’abakinnyi barimo kapiteni we Iker Casillas na visi kapiteni Xavi Hernandez.

Hirabazwa niba Del Bosque aza kwicaza umunyezamu Casillas watsinzwe umukino ubanza agakora n’amakosa adakenewe, hakajyamo Pep Reina kuko David De Gea afite imvune.

Del Bosque yavuze ko gutsindwa na’u Buholande byabasigiye isomo rikomeye, bari guharanira kwishakamo ibisubizo ngo barebe ko bakomeza kwigira imbere.

Yagize ati “ Nziko abakinnyi bagize isomo ryiza bakuramo, ndizera ko baza kwibagirwa intsinzwi yadushenguye bikabafasha kwikura mu bibazo.”

Amagambo nkaya yavuzwe na Andreas Iniesta wemeza ko ibyabaye ari impanuka ko imyitozo bafite ibemerera kubona intsinzi.

Nyuma yo gukina iminota 60 agasimburwa atanyuzwe ku mukino wa Australia, ni umwanya wa Arturo Vidal wo kwigaragaza kuva abazwe muri Gicurasi.

Del Bosque ngo u Buholande bwabahaye isomo, araha icyizere abakunzi ba Espagne

Benshi mu bakinnyi ba Espagne bakinana na Alex Sanchez muri FC Barcelona

Mu mikino 10 yabahuje na Espagne, Chili yatsinzwe 8 banganya 2.

Mu mikino ibiri bahuriye mu gikombe cy’Isi, Espagne yayitsinze yombi, mu 2010 ibitego 2-1 no mu 1950 kuri Maracana bakiniraho uyu munsi ibitego 2-0.

Mu mikino ibiri Chili yakinnye n’ikipe ifite igikombe yarayitsinzwe mu 1962 na 1998 bakina na Brazil.

Ubwo batsindaga Australia ibitego 3-1 byari ubwa mbere kuva mu 1962 batsinda ibitego 3 mu mukino umwe w’igikombe cy’Isi.

Cameroun vs Croatia Saa 23.59 @ Arena Amazonia

Ntibiremezwa niba kapiteni wa Cameroun, Samuel Eto’o wagize imvune mu ivi akina uyu mukino basabwa gutsinda ngo bongera amahirwe yo gukomeza muri 1/8, ushobora gusimburwa na Vincent Aboubakar.

Rutahizamu wa Bayern Munich, Mario Mandzukic wari wahagaritswe kubera amakarita ashobora kubanza mu kibuga agafatanya na Nikica Jelavic nubwo Luka Modric yari yagize imvune nto ku kirenge ku mukino ubanza.

Niko Kovac, umutoza wa Croatia avuga ko kugaruka kwa Mandzukic ari inzira nziza yo gutsinda Cameroun kuko eri rutahizamu utuma bagenzi be bakinira imbere.

Yagize ati “ Imikinire ya Mandzukic igomba gutera ubwoba Cameroun igafasha Croatia.”

Kapiteni wa Cameroun, Samuel Eto'o ashobora kudakina umukino wa Croatia

Mario Mandzukic (ubanza ibumoso) yitezweho byinshi imbere ya Cameroun

Stephane M’Bia na Ivan Rakitic bakinana muri Sevilla. Kuva Cameroun igeze muri ¼ mu 1990, iki gihugu ntikirongera kurenga amajonjora.

Cameroun na Croatia ziri mu itsinda rya mbere ririmo Brazil yanganyije na Mexique,zombi zifite amanota 4.

[email protected]