Ni umukino wahuje amakipe yamaze gusezererwa mu gikombe cy’Isi yo mu itsinda B,Espagne, ikipe ya mbere, ku rutonde rw’Ishyirahamwe mpuzamahanga rwo muri Gicurasi na Australia ya nyuma (64) ku makipe 32 yitabiriye igikombe cy’Isi.

Ku munota wa 36, David Villa wakinaga umukino wa nyuma mu ikipe y’igihugu yatsinze igitego cya mbere Australia. Ni igitego cya mbere gitsindishijwe agatsintsino mu gikombe cy’Isi nyuma y’icy’Umunya Autriche, Pezzey mu 1982.

Mu mikino 97 yakiniye Espagne yatsinzemo ibitego 59 harimo 9 mu gikombe cy’Isi.

Igice cya mbere cyarangiye, Espagne igumanye umupira ku kigereranyo cya 57% n’amashoti ane yatewe mu izamu rya Australia yakinaga idafite Tim Cahill, umunya Australia watsinze ibitego 5 mu 10 batsinze mu gikombe cy’Isi.

Juan Mata yasimbuye David Villa. Francesc Fábregas byari byavuzwe ko umutoza Vicente Del Bosque yamwirukanye mu myitozo yasimbuye Santiago Cazorla.

Fernando Torres yatsindiye Espagne igitego cya kabiri ku mupira yaherejwe na Iniesta ku munota wa 69.

Mata yatsinze agashinguracumu ku munota wa 82 aherejwe na Fábregas.

Espagne yari yatwaye iki gikombe mu 2010 isezerewe ibonye amanota atatu nyuma y’u Buholande bwa mbere na Chili ya kabiri. Ku nshuro ya mbere, Australia isezerewe itabonye inota na rimwe mu gikome cy’Isi.

David Villa yatowe n’umukinnyi mwiza muri uyu mukino mu gihe wari umukino wa mbere ku munyezamu wa Espagne, Pepe Reina wari mu izamu nubwo yahamagawe mu 2006 na 2010.

[email protected]