Muri uyu mukino Etincelles FC yari yahigiye gutsinda, amakipe yombi yatangiye asatirana bigaragara ko ashaka gutsinda, ariko uburyo bwagiye buboneka ba rutahizamu ntibabashe kububyaza umusaruro.

Umukino waje guhindura isura ubwo Nshuti Innocent yatsindaga igitego ku munota wa 21 bituma Etincelles ijya ku gitutu maze umukinnyi wayo ukina inyuma iburyo, Akayezu Jean Bosco, akorera ikosa Nshuti Innocent ku munota wa 23, umusifuzi amuha ikarita itukura.

Iyi karita ntiyavuzweho rumwe kuko abenshi babonaga abakinnyi bombi bagonganiye ku mupira.

Igice cya kabiri cyatangiye APR FC ishaka igitego cya kabiri ariko na Etincelles FC ikanyuzamo, igasatira ishaka igitego cyo kwishyura.

Umutoza wa Etincelles FC, Bizimana Abdu ‘Bekeni’ yagerageje gusimbuza yongeramo izindi ngufu ariko uburyo bwose bagiye babona basangaga ab’inyuma ba APR FC barangajwe imbere na Manzi Thierry bahagaze bwuma.

Mu minota ya nyuma ny’umukino, Etincelles yokeje igitutu APR FC binyuze kuri ba rutahizamu Mutebi Rachid na Kambale Salita Gentil, ariko ntibabashe kuboneza mu izamu uburyo babonye.

Byasabye gutegereza umunota wa 90 maze Niyibizi Ramadhan yishyurira Etincelles ku umupira wari umaze akanya ucaracara imbere y’izamu rya Rwabugiri Omar.

Kunganya uyu mukino byatumye APR FC itaratsindwa, igira amanota 42 ku mwanya wa mbere, irusha amanota ane Rayon Sports ya kabiri, yo yanyagiye Espoir FC ibitego 3-0.

Etincelles FC yagize amanota 22 ku mwanya wa cyenda.

Abakinnyi babanjemo ku mpande zombi

Etincelles FC: Nsengimana Dominique, Gikamba Ismael (C), Nshimiyimana Abdu, Habimana Youssuf, Niyonsenga Ibrahim, Ngabo Mucyo Freddy, Muteebi Rachid, Uwimana Guillain, Tuyisenge Hakim, Kanamugire Moses na Akayezu Jean Bosco.

APR FC: Rwabugiri Omar, Manzi Thierry (c), Manishimwe Emmanuel, Mutsinzi Ange, Mushimiyimana Mohammed, Omborenga Fitina, Bukuru Christophe, Butera Andrew, Manishimwe Djabel, Usengimana Danny na Nshuti Innocent.

Etincelles FC y'abakinnyi 10 yahagamye APR FC mu mukino wabereye i Rubavu
Etincelles FC y'abakinnyi 10 yahagamye APR FC mu mukino wabereye i Rubavu