Visi perezida w’ikipe ya Etincelles, Ndolimana Emmanuel, yemeje aya makuru avuga ko ari ubusabe bw’umutoza mukuru Calum Shaun Selby wifuza kwizanira abamwunganira.

Ati “Twamaze kubagezaho amabaruwa abasezerera, ni abatoza beza kandi bashoboye ariko umutoza mukuru yasabye ko yakwizanira abamwungiriza be mu rwego rwo gutegura ikipe ikomeye.”

Nubwo ikipe ya Etincelles irimo gusezerera abatoza, ku isoko ry’abakinnyi naho ikomeje kwisuganya ishingiye ku bakinnyi bakiri bato kandi bakomoka mu Karere ka Rubavu.

Ku ikubitiro, uyu munsi yasinyishije myugariro Nsabimana Hussein ‘Dessailly’ wakinaga muri mukeba, Marines FC, ndetse ibiganiro bikaba bikomeje kuri mugenzi we Ndayishimiye Thierry wifuzwa n’amakipe y’i Kigali.

Etincelles FC yasoje umwaka ushize w’imikino iri ku mwanya wa 13 n’amanota 24 mu mikino 23 yakinwe.

Mu mikino itatu Umwongereza Calum Shaun Selby yayitojemo, yabonyemo amanota abiri ubwo yanganyaga na Marines FC igitego 1-1 ndetse na Etincelles FC ubusa ku busa mu gihe yatsinzwe na Rayon Sports ibitego 2-1.

Etincelles yirukanye abatoza babiri bari bungirije umutoza mukuru Calum Shaun Selby