Ikipe y’igihugu ya Pologne niyo yafunguye amazamu ku munota wa kabiri w’umukino gitsinzwe na rutahizamu Robert Lewandowski.

Portugal yakomeje kotsa igitutu ikipe ya Pologne ndetse ku munota wa 33 w’igice cya mbere, Renato Sanches w’imyaka 18 atsinda igitego cyo kwishyura nyuma yo gucenga ab’inyuma ba Pologne.

Amakipe yombi yakomeje gusatirana bashakisha ikindi gitego biranga iminota 90 irangira ari igitego 1-1 ndetse na 30 y’inyongera ntiyabasha kugaragaza ikipe ikomeza.

Hitabajwe penaliti, Ronaldo wa Portugal abimburira bagenzi be ayitera neza n’abandi bose barazinjiza.

Umukinnyi wa Pologne, Jacob Blaszczykowski yateye penaliti ya kane arayihusha, Ricardo Quaresma wa Portugal atsinda iya nyuma birangira ari penaliti 3-5.

Portugal igeze muri ½ itarabasha gutsinda umukino n’umwe mu minota 90 isanzwe y’umukino kuko imikino itatu yo mu matsinda yose yayinganyije, muri 1/8 isezerera Croatia hitabajwe iminota 30 y’inyongera izamuka ku gitego kimwe cya Ricardo Quaresma cyabonetse ku munota w’i 117.

Muri ½ Portugal igomba kuzahura n’ikipe irokoka hagati ya Wales n’u Bubiligi ziri bukine uyu munsi kuwa Gatanu.

Imikino isigaye yo muri ¼ :

*Wales vs Belgium -kuwa Gatanu tariki ya 1 Nyakanga 2016

*Germany vs Italy -Kuwa gatandatu tariki 2 Nyakanga 2016

*France vs Iceland -Ku cyumweru tariki 3 Nyakanga 2016

Robert Lewandowski niwe wafunguye amazamu ku ruhande rwa Pologne ku munota wa kabiri w'umukino

Renato atsinda igitego cyo kwishyura ku ishoti rikomeye

Portugal bishimira igitego cya Renato Sanchez

Abafana ba Pologne na Portugal bafatanye mu mashati

Umutoza wa Prtugal, Fernando Santos yari yambariye urugamba

Ronaldo yabuze uburyo bwari bwabazwe bwo kubona igitego

Jacob yahushije penaliti ikipe ye ihita isezererwa

Quaresma atera penaliti ya nyuma yafashije ikipe ye itike ye yo gukomeza

Pepe(wambaye 3), Cristiano Ronaldo na Jose Fonte bishimira intsinzi

Uko abakinnyi bateye penaliti ku mpande zombi( hejuru ni Portugal , hasi ni Pologne)

Byari ibyishimo bidasanzwe ku ikipe ya Portugal yasezereye Pologne mu mikino ya Euro 2016

Nyuma y'umukino umufana wa Portugal yinjiye mu kibuga ashaka gusuhuza Ronaldo abashinzwe umutekano baramukumira