Ku wa Kane, saa Yine z'ijoro, ni bwo umusifuzi w'Umunya-Espagne, Antonio Mateu, yahushye mu ifirimbi yemeza urugamba hagati y'aya makipe yombi yari yanganyije ibitego 2-2 mukino.

Mu ntangiriro z'igice cya mbere, Arsenal yahuye n'ibibazo, umutoza Mikel Arteta akora impinduka atateganyijwe akuramo Takehiro Tomiyasu wagize imvune ku munota wa cyenda, hajyamo Ben White.

Kuva icyo gihe, Sporting ni yo yatangiye neza umukino kuko yihariye umupira mu minota 15 ya mbere ihererekanya cyane nk'ikipe yifuzaga kubona igitego hakiri kare.

Ibi ntibyakunze kuko uko iminota yigiraga imbere, ni ko Arsenal yinjiye gahoro gahoro mu mukino ndetse inatangira kwegera imbere nk'ikipe yakiniraga imbere y'abafana bayo.

Ibi byaje gutuma ibona igitego cya mbere muri uyu mukino cyatsinzwe na Granit Xhaka, ku kazi gakomeye kakozwe na Gabriel Martinelli ku munota wa 19.

Arsenal yongeye kuvunikisha William Saliba asimburwa na Rob Holding. Ibi byabarishije nabi Arteta nubwo igice cya mbere cyarinze kirangira bikiri 1-0.

Amakipe yombi akimara kuva mu karuhuko, Arsenal yakoze impinduka ikura mu kibuga Gabriel Jesus kugera imbere y'izamu biragabanuka.

Sporting yo yaje iri hejuru cyane, igitangira isatira cyane ku buryo umukino wakinirwaga mu kibuga cya Arsenal, iyi kipe yo muri Portugal ikoresha imbaraga nyinshi ishaka kwishyura.

Byasabye iyi kipe yo muri Portugal gutegereza umunota wa 63 kugira ngo yishyure, ibona igitego cyinjijwe mu izamu na Pedro Gonçalves kubera amakosa yo guhagarara nabi kwa Aaron Ramsdale, umunyezamu wa Arsenal.

Kuva iki gitego cyagera mu izamu, amakipe yombi yasatiranye cyane ariko Sporting ni yo yageze imbere y'izamu cyane, ishaka gutsinda igitego cya kabiri.

Mu minota ya nyuma y'umukino, Sporting yakoze impinduka ikura mu kibuga Fernandes Paulinho, Pedro Gonçalves na Matheus Reis, ibasimbuza Nuno Santos, Dario Essugo na Youssef Chermiti.

Ntacyo izi mpinduka zakoze kuko iminota 90 y'umukino yarangiye nta kipe ibashije kongera kureba mu izamu, biba ngombwa ko umukino wongerwaho iminota 30 y'inyongera.

Iyi minota yagaragayemo kugarira cyane ku mpande zombi byiganjemo gusatira kwa Arsenal, byaje guhesha ikarita itukura Manuel Ugarte wabonye iya kabiri y'umuhondo ku munota wa 119.

Umusifuzi yahise asoza umukino, zikinganya, bigombera kwitabazwa penaliti kugira ngo hagaragare ikomeza mu cyiciro gikurikiyeho cya Europa League.

Aka kanya ntikahiriye Arsenal kuko yatsinzwe penaliti 5-3 isezererwa muri ⅛ cya UEFA Europa League.

Indi mikino yabaye kuri uyu wa Kane, Manchester United ibifashijwemo na Marcus Rashford, yatsinze igitego 1-0 Real Betis mu mukino wabereye muri Espagne, ikomeza ku giteranyo cy'ibitego 5-1 mu mikino ibiri.

Feyenoord yakomeje imaze kunyagira Shakhtar Donetsk 7-1, Fenerbahçe itsinda Sevilla 1-0 nubwo ntacyo byayimariye kuko igiteranyo cyabaye ibitego 2-1.

Juventus yakomeje imaze gutsinda Freiburg 2-1, Ferencváros itsindwa na Bayern Leverkusen 2-0, Roma nyuma yo kunganya na Real Sociedad 0-0, yakomeje kuko yatsinze umukino ubanza ibitego 2-0 mu gihe Union St. Gilloise yatsinze Union Berlin ikabona gukomeza.

Tombola y'uko amakipe azahura muri 1/4 irakorwa kuri uyu wa Gatanu, tariki ya 17 Werurwe, i Nyon mu Busuwisi.