Uyu mukino wabaye mu ijoro ryo ku Cyumweru, tariki ya 10 Gicurasi 2026.

Barcelona yagiye muri uyu mukino isabwa inota rimwe ikegukana igikombe, mu gihe Real Madrid yo kwari ukuyikerereza.

FC Barcelona yatangiye neza umukino, bidatinze Marcus Rashford yafunguye amazamu ku munota wa cyenda, ku gitego yatsinze kuri coup franc nziza yateye umunyezamu Thibaut Courtois akananirwa guhagarika umupira.

Iyi kipe yari mu rugo yakomeje gukina neza no gusatira ubona irusha Real Madrid bigaragara.

Ku munota wa 18, Ferran Torres yatsinze igitego cya kabiri. Real Madrid yagerageje gusatira ishaka uko yishyura ariko bayibera ibamba.

Igice cya mbere cyarangiye FC Barcelona yatsinze Real Madrid ibitego 2-0.

Mu gice cya kabiri, iyi kipe y’i Madrid yakomeje gusatira ariko Vinicius Junior na Jude Bellingham bagahusha uburyo bw’ibitego babonaga.

Ku munota wa 70, Bellingham yatsinze igitego cya mbere cya Real Madrid ariko umusifuzi avuga ko habayeho kurarira nticyemerwa.

Mu minota ya nyuma umukino watuje ugenda gake n’amakipe yombi agabanya gusatirana.

Umukino warangiye FC Barcelona yatsinze Real Madrid ibitego 2-0 igira amanota 91, Real Madrid ya kabiri ifite 77 bityo iyi kipe y’i Catalonia yegukana Igikombe cya Shampiyona habura imikino itatu ngo irangire.

Ni ku nshuro ya mbere ikipe itwariye igikombe kuri uyu mukino uhuza abakeba bo muri Espagne.

Mbere y'umukino hafashwe umunota wo kwibuka se w'umutoza wa FC Barcelona Hansi Flick

Rashford atsinda coup franc

Thibaut Courtois areba uko umupira ujya mu izamu

Marcus Rashford yishimira igitego

Nk'ibisanzwe El Clasico ntiburamo ubushyamirane

Ferran Torres yishimira igitego cya kabiri yatsinze

Abakinnyi ba Barcelona bishimana n'umutoza Hansi Flick