Uyu mwanya u Rwanda ruriho, rwawugezeho mu Ugushyingo 2021 ruvuye ku mwanya wa 133 rwariho mu Ukwakira uyu mwaka.

Ni umwanya utarahindutse na gato ku rutonde ngarukakwezi rwa FIFA rw’Ukuboza 2021 ari na rwo rusoza uyu mwaka ndetse n’amanota aguma kuba 1095,34 bitewe n’uko nta mikino mpuzamahanga y’ibihugu yabaye mu Ukuboza.

U Rwanda ni urwa Kane muri Afurika y’Iburasizuba nyuma ya Uganda ya mbere ikaba n’iya 82 ifite amanota 1285.28 ku rwego rw’Isi. Kenya ni iya 102 n’amanota 1202.26, Tanzania ya 131, Repubulika Iharanira Demokarasi ya Congo iri hafi kwinjira muri uyu muryango iri ku mwanya wa 64 n’amanota 1375,64 mu gihe u Burundi buri ku mwanya wa 140 n’amanota 1075,82.

Muri Afurika, ibihugu 10 biyoboye ibindi ni Sénégal (ya 20 ku Isi), Maroc (ya 28), Algérie (ya 29), Tunisia (ya 30), Nigeria (ya 36), Misiri (ya 45), Cameroun (ya 50), Ghana (ya 52), Mali (ya 53) na Côte d’Ivoire (ya 56).

Kuba u Rwanda ari urwa 39 muri Afurika bishobora gutuma rwongera guhera mu majonjora y'ibanze mu gushaka itike y'amarushanwa atandukanye arimo CHAN n'Igikombe cya Afurika cy'Ibihugu.

Urutonde rwa FIFA ni rwo rwifashishijwe ubwo u Rwanda rwahuraga na Seychelles mu ijonjora rya mbere ryo gushaka itike y'Igikombe cy'Isi cya 2022 mu gihe kandi rwanifashishijwe muri tombola y'ijonjora rya gatatu (muri Afurika) rizakinwa muri Werurwe 2022.

Ku rwego rw’Isi, u Bubiligi ni bwo buyoboye ibindi bihugu n’amanota 1828.45, bukurikiwe na Brésil n’amanota 1826.35 mu gihe u Bufaransa bufite amanota 1786.15 ku mwanya wa gatatu.

Ibindi bihugu biri mu myanya 10 ya mbere ku Isi ni u Bwongereza, Argentine, u Butaliyani, Espagne, Portugal, Denmark n’u Buholandi.