Lampard w’imyaka 38, akomoka mu Bwongereza, akaba yarakiniye amakipe arimo West Ham, Chelsea, Manchester City zose zo mu Bwongereza na New York City yo muri Leta Zunze Ubumwe za Amerika ari naho arangirije umupira, zose ziyongera ku ikipe y’igihugu cye yakiniye imyaka 15 kugeza mu 2014.

Mu myaka yose yakinnye umupira w’amaguru nk’umukinnyi wo hagati mu kibuga, Lampard yagaragaye mu kibuga yambaye imyenda ya Chelsea inshuro 649, naho ikipe y’igihugu cye imuhamagara inshuro 106 agitsindira ibitego 29.

Muri icyo gihe cyose amaze akina umupira w’amaguru, Lampard yatwaye ibikombe bikomeye 11 birimo ibya shamopiyona y’u Bwongereza bitatu n’icya UEFA Champions League yegukanye mu 2012 ari mu ikipe ya Chelsea. Yatwaye kandi ibikombe bine by’igihugu (FA Cup), bibiri bya League cup na kimwe cya Europa leugue.

Lampard yageze mu ikipe ya Chelsea mu 2001 aguzwe miliyoni 11 z’ama-pound, imukuye muri West Ham. Yafashije iyi kipe yambara ubururu gutwara ibikombe binyuranye ndetse anayitsindira ibitego 211, ari nawe mukinnyi ufite agahigo ko gutsindira iyi kipe ibitego byinshi.

Lampard yatangaje ko asezeye burundu gukina umupira w'amaguru kuri uyu wa Kane abinyujije ku rukuta rwe rwa Instagram.

Yatangaje ko nubwo hari amakipe yamwifuzaga ngo ayakinire,abona imyaka 38 afite ihagije ngo asezere kuri ruhago yinjire mu bundi buzima.