Tariki 25 Nyakanga APR FC yatomboye Gaadiidka mu ijonjora rya mbere rya CAF Champions League aho umukino wa mbere wari kuzahuza aya makipe wari kuzabera muri Somalia.
Umuyobozi wa Gaadiidka FC, Bile Moha'ud Jimale, yabwiye IGIHE ko basabye kuzakirira umukino ubanza i Kigali, bivuze ko imikino yombi ariho izabera.
Yagize ati "Yego tuzakinira aho [I Kigali] umukino ubanza n'uwo kwishyura Imana nibishaka. Federasiyo yacu yarabisabye ndetse yaremerewe."
Perezida wa Gaadiidka FC, Bile Moha'ud Jimale, yemereye IGIHE ko
basabye kuzakirira APR FC i Kigali. pic.twitter.com/vzxT0tVlpQ— IGIHE Sports (@IGIHESports) August 3, 2023
Ntabwo uyu muyobozi yigeze asobanura impamvu habayeho gusaba kuzakirira imikino mu Rwanda.
Gaadiidka FC yo muri Somalia yandikiye FERWAFA iyisaba ko yazakirira APR FC i Kigali umukino ubanza mu Ijonjora rya Mbere rya CAF Champions League; uteganyijwe ku wa 18 Kanama 2023. pic.twitter.com/Y9GIeYAKpR
— IGIHE Sports (@IGIHESports) August 3, 2023
Gaaddidka FC yegukanye ibikombe bibiri bya Shampiyona yo muri Somalia mu 1990 n’iyo iheruka mu 2022. Ni ikipe ibarizwa mu Mujyi wa Mogadishu muri Somalia. Ikinira kuri Banadir Stadium, ifite ubushobozi bwo kwakira abafana 30.000.
APR FC ni yo izatangirira hanze mu mukino ubanza uteganyijwe hagati ya tariki 18 na 20 Kanama, mu gihe uwo kwishyura uzakinwa hagati ya tariki 25 na 27 Kanama 2023 yombi izabera i Kigali.
APR FC yiyubatse cyane uyu mwaka ndetse yifuza kugera kure mu mikino nyafurika nyuma yo guhindura Politiki yo gukinisha abenegihugu igasubira ku guha ikaze abanyamahanga. Ubu igaragaramo amasura mashya ndetse y'abakinnyi bakomeye, iherutse no gutsinda Marines ibitego 3-1 kuwa gatatu tariki 2 Kanama 2023.







Ibitekerezo 0