Isezera rye ryabaye nyuma yo gutsinda umukino wabahuje na Almeria ibitego 2-0, kuri stade Spotify Camp Nou.

Uyu wari umukino wari witabiriwe n’abatari bake kuri iki kibuga gisanzwe cyakira abafana benshi. Imibare igaragaza ko uyu mukino wakurikiwe n’abafana basaga ibihumbi 92.

Aba bose bari baje kureba umukino wa 616, Gerard Piqué yari akinnye mu myaka 15 amaze kuri iki kibuga.

Mu kibuga hagati mbere y’uko umukino utangira no ku byapa byamamaza ku kibuga hari handitseho ’Sempr3’ ijambo risobanura ko uyu mugabo wambaraga nimero 3, azahora yanditse mu mateka y’iyi kipe yafashije gutwara ibikombe 30 mu gihe ahamaze.

Mu gihe umusifuzi Pablo Gonzalez wasifuye uyu mukino yari amaze kwemeza ko umukino urangiye, Piqué yateruwe na bagenzi be bakinana ndetse na Stade yose itangira kuririmba izina rye bamwereka kumwishimira kudasanzwe.

Piqué yahawe ijambo amaze gusezera abakinnyi be mu kibuga kugira ngo abwire abakunzi ba FC Barcelona ikimuri ku mutima mbere yo kugenda.

Mu gahinda kenshi yababwiye ko ubuzima bwe bwose bwubakiye kuri Barcelona kandi nta handi ateganya kujya.

Ati “Ndashimira buri wese wagize uruhare mu bigwi nagezeho ndi muri iyi kipe. Iyo umaze gukura nibwo usobanukirwa ko kureka umuntu mugatandukana nabyo biba ari urukundo. Urukundo rero ruri hagati yanjye na Barcelona rukeneye kwitonderwa no gutuza, kandi nzagaruka. Navukiye aha, ntura hano ndetse nzanapfira hano.”

Tariki 27 Gicurasi 2008 ni bwo FC Barcelona yasinyishije Gerard Piqué nk’umukinnyi wayo avuye muri Manchester United yo mu Bwongereza.

Yatangiriye ruhago mu ishuri ry’abato ba FC Barcelona mu 1997 mbere yo kuyivamo mu 2004, yerekeza muri Manchester United yamazemo imyaka ine mbere yo gusubira ku ivuko.

Muri uyu mwaka wa 2022/2023, Piqué ntiyahiriwe haba mu kibuga ndetse no mu muryango kuko yatandukanye n’umugore we Shakira Isabel Mebarak Ripoll bari bamaranye hafi 12.

Muri FC Barcelona, Gerard Piqué yakinnye imikino 615, atsinda ibitego 52; yatwaranye na yo La Liga umunani, Champions League eshatu, Spanish Super Cup esheshatu, Copa del Rey zirindwi UEFA Super Cup eshatu na FIFA Club World Cup imwe.

Amarira yari yose kuri Gerard Piqué wasezeraga abafana

Abakinnyi ba Barcelona bishimiye mugenzi wabo Gerard Piqué wasezeye umupira

Barcelona yahamije ko itazibagirwa umumaro wa Gerard Piqué mu ikipe

Barcelona yahaye agaciro igihe imaranye na Gerard Piqué

Gerard Piqué ubwo yasezeraga ku bafana ba Barcelona

Gerard Piqué yazanye ku kibuga n'abana be yavuze ko aribo agiye kumarana nabo umwanya munini