Muri Tanzania, Simba SC ikomeje gukina imikino y’ibirarane, aho kuri ubu irushwa imikino irindwi n’amakipe abiri ayiri imbere. Iyi kipe yaherukaga gutsindwa na Kagera Sugar ibitego 2-1 mu mukino wabaye ku wa Gatandatu.

Kuri uyu wa Kabiri, yari yasuye Alliance FC mu mukino wayo wa 25 wa shampiyona wabereye kuri CCM Kirumba. Haruna Niyonzima yafunguye amazamu muri uyu mukino ku gitego yatsinze ku munota wa 20 ku mupira muremure wari uhinduwe na Muzamiru Yassin.

Habura iminota 25 ngo umukino urangire, Emmanuel Okwi yatsindiye Simba SC igitego cyashimangiye intsinzi ku mupira yahawe na Nicholas Gyan. Rutahizamu w’umunyarwanda, Meddie Kagere, yinjiye mu kibuga ku munota wa 80 asimbuye John Raphael Bocco.

Simba SC yahise igira amanota 63 ku mwanya wa gatatu, isigara irushwa amanota atatu na Azam FC ya kabiri ndetse n’amanota 11 irushwa na Yanga SC ya mbere mu mikino 32.

Tuyisenge Jacques yarokoye Gor Mahia ku munota wa nyuma

Igitego cyo ku munota wa nyuma cyatsinzwe na Jacques Tuyisenge n’umutwe, cyafashije Gor Mahia gusubira ku mwanya wa mbere muri shampiyona ya Kenya, itsinze Bandari FC mu mukino wabereye kuri Moi Stadium i Kisumu kuri uyu wa Kabiri.

Gor Mahia ifite indi mikino y’ibirarane itatu, ifite amanota 49 ku mwanya wa mbere, aho irusha inota Sofapaka ya kabiri n’amanota 48 mu mikino 25 imaze gukinwa muri Kenya Premier League.

AFC Leopards itozwa na Casa Mbungo André, igakinamo Ndayishimiye Eric ‘Bakame’ na Kayumba Soter yo irakirwa na Kariobangi Sharks kuri uyu wa Gatatu. Iyi kipe iri ku mwanya wa 10 n’amanota 30, ifite ibirarane bibiri.

Haruna Niyonzima yatsindiye Simba SC mu gice cya mbere

Tuyisenge Jacques yatsindiye Gor Mahia mu minota y'inyongera

Simba SC ikomeje gushaka umwanya wa mbere