Byari ibirori by’akataraboneka byahereye kuri Stade Amahoro, aho abakinnyi bashyikirijwe igikombe abarimo rutahizamu w’umunya-Ghana Michael Sarpong ndetse n’umunya Brazil Jonathan Da Silva, bakakizengurukana Stade yose bacyereka abafana babashyigikiye mu mikino 30 yose ya Shampiyona.

Mbere yo gusohoka muri Stade Amahoro, bafana bahahuriye ari benshi bamwe bazanywe no gusezera ku ikipe yabo mbere y’uko ikomereza ibirori kuri Matina Motel y’Umuyobozi wungirije wayo, Muhirwa Freddy, mu gihe abandi bari biganjemo abamotari bo bari biteguye kuyiherekeza mu rugendo rwose rwatangiriye kuri Stade Amahoro kugera mu mujyi.

Aha kandi niho umufana rurangiranwa wa Gikundiro Ngenzahimana Jean Bosco uzwi ku izina rya Rwarutabura, yasabwe n’abapolisi ko yamanuka ku modoka yo mu bwoko bwa Pajero yari yiteguye kugenda yicaye hejuru muri urwo rugendo.

Rwarutabura yabanje gutsimbarara maze amanurwa kuri iyo modoka n’abapolisi bari bashinzwe umutekano kuri Stade Amahoro, akomeza urugendo yicaye kuri moto nk’abandi bafana bose.

Kuri Matina Motel bakunze kwita kwa Freddy niho habereye ibirori by’ijoro. Abakunzi ba Gikundiro ku ikubitiro bataramiwe na Senderi International Hit mu ndirimbo ye ikunzwe cyane n’abafana b’iyi kipe aho yagiraga ati ”Ubyemere cyangwa ubihakane Rayon ports ifite ingufu.’’

Nyuma y’uyu muhanzi hakurikiyeho amagambo y’abayobozi ba Rayon Sports batandukanye bagiye bashimira abakinnyi, abatoza ndetse n’abafana batahwemye kubaba hafi yaba muri Shampiyona, muri CAF Confederations Cup ndetse no ku myitozo y’ikipe yabo.

Umuyobozi w’iyi kipe Muvunyi Paul abemerera ko noneho Rayon Sports izagera ku mukino wa nyuma wa CAF Champions League, izaserukiramo u Rwanda.

Umunyamabanga wa Leta muri Minisiteri y’ububanyi n’amahanga, ushinzwe EAC, Amb. Olivier Nduhungirehe, yabwiye abari aho ko nubwo atari umufana wa Rayon Sports ariko ayikunda, abashimira ubwitange bagaragaje muri uyu mwaka wa Shampiyona ndetse abifuriza kuzitwara neza mu marushanwa yo ku rwego rw’umugabane wa Afurika.

Nyuma y’iri jambo, umuhanzi King James, yataramiye abafana ba Gikundiro mu ndirimnbo bakunze cyane yitwa ‘’Umuriro watse’’ yanyuze benshi ari nabwo bamuzaniye umunyezamu Mazimpaka Andre bamwikoreye ku rutugu.

Uyu munyezamu yafatanyije n’uyu muhanzi gususurutsa abafana ndetse na Rwarutabura udatangwa n’ibirori by’iyi kipe afatanya n’aba basore bombi.

Amafoto: Ntare Julius