Ni ku nshuro ya kabiri Katie McCabe na Caitlin Foord bageze mu Rwanda kuko no mu 2022 bari bitabiriye iyi gahunda. Ni mu gihe, Laia Codina we ari ubwa mbere ageze mu Rwagasabo.

Muri iyi nkuru reka tugaruke kuri bimwe wamenya kuri aba bakinnyi baherutse guhesha Arsenal Igikombe cya UEFA Women’s Champions League.

Katie Alison McCabe ni Umunya-Irlande w’imyaka 30 usanzwe ari Kapiteni w’Ikipe y’Igihugu.

Azwiho gukina imyanya myinshi mu kibuga kuko ashobora gukina inyuma ku ruhande rw’ibumoso cyangwa imbere ndetse rimwe na rimwe anitabazwa mu kibuga hagati. Yageze muri Arsenal mu 2015 avuye muri Raheny United y’iwabo.

McCabe afatwa nk’ikirango cy’umupira w’amaguru w’abagore muri Irlande. Mu 2023 yatoranyijwe mu bagombaga guhabwa Ballon d’Or.

Uyu mukinnyi kandi ni umwe mu bemera ko akundana n’abakobwa bagenzi be, aho yakanyujijeho na Ruesha Littlejohn bakundanye kuva mu 2016 kugeza mu 2023.

Kuri ubu, akundana na Caitlin Foord bakinana muri Arsenal ndetse banazanye mu Rwanda.

Undi mukinnyi ni Umunya-Australia, Caitlin Foord w’imyaka 31 ukina nka rutahizamu.

Ni umwe mu bafite izina rikomeye mu ku Mugabane wa Aziya kuko mu 2011 na 2016 yabaye umukinnyi wahize abandi bakomoka kuri uyu mugabane.

Yageze muri Arsenal mu 2020 amaze gukinira imikino irenga 150 akayitsindamo ibitego 50. Yari umwe mu bagize ikipe yegukanye UEFA Women's Champions League 2025.

Ni umwe mu bakundana n’abakobwa bagenzi be kuko mu 2020 yabyumvaga kimwe na Lia Wälti bakinanaga muri Arsenal, mbere yo gutandukana mu 2022.

Nyuma y’umwaka umwe yahise atangira gukundana na Katie McCabe na we bakinana muri Arsenal ndetse banazanye mu Rwanda.

Laia Codina Panedas ni undi mukinnyi waje mu Rwanda. Ni Umunya-Espagne w’imyaka 25 utaragira ibigwi bikomeye muri uyu mukino.

Ni myugariro wakuriye i Catalogna mu makipe y’abato ya FC Barcelone akina mu makipe y’abahungu kugeza ku myaka 14. Yageze muri Arsenal mu 2023.

Uyu mukinnyi afite impamyabumenyi y’icyiciro cya kabiri cya Kaminuza mu itangazamakuru yakuye muri Universidad de Vic y’iwabo i Catalogna.