Chelsea irahurira na LOSC Lille i Stamford Bridge kuri uyu wa Kabiri mu gihe Villareal ikina na Juventus.

Ku wa Gatatu Atlético de Madrid izakirira Manchester United kuri stade ya Wanda Metropolitana. Benfica Lisbonne yo muri Portugal izakina na Ajax yo mu Buholandi.

Chelsea irongera gukora amateka?

Chelsea ifite igikombe cya UEFA Champions League cy’umwaka ushize w’imikino wa 202o-21 igiye gukina uyu mukino iri ku mwanya wa gatatu muri Premier League irushwa amanota 13 na Manchester City.

Ku ruhande rwa LOSC Lille, irarushwa amanota 23 na Paris Saint-Germain iri ku mwanya wa mbere muri Ligue 1, Shampiyona y’icyiciro cya mbere mu Bufaransa.

Chelsea na LOSC Lille zimaze guhurira mu mikino y’i Burayi inshuro ebyiri zonyine. Hari mu mikino y’amatsinda ya UEFA Champions League 2019-20. Chelsea yarayitsinze yose.

Imikino 10 yo mu marushanwa yo ku mugabane w’i Burayi iheruka guhuza Chelsea n’amakipe yo mu Bufaransa, Chelsea yatsinzwemo umwe ,inganya itatu, itsinda itandatu.

Ni ku nshuro ya kabiri ikipe ya LOSC Lille ibonetse muri 1/8 cy’imikino ya UEFA Champions League.

Undi mukino ukinwa kuri uyu wa Kabiri ni Villareal iri buhure na Juventus. Villareal iri ku mwanya wa gatandatu ikaba irushwa amanota 12 na Real Madrid iri ku mwanya wa mbere.

Muri Serie A, Juventus irushwa amanota icyenda na AC Milan iri ku mwanya wa mbere.

Ni ku nshuro ya mbere aya makipe ari buhurire mu irushanwa rya UEFA Champions League mu mateka yayo.

Juventus yashoboye gukomeza mu mikino itandatu mu munani yo gukuranamo yahuriyemo n’amakipe yo muri Espagne mu mikino ya UEFA Champions League kuva mu 2003.

Unai Emery utoza Villareal amaze gutsinda umukino umwe, anganya umwe, atsindwa ine mu mikino itandatu yo gukuranamo muri UEFA Champions League.

Atlético de Madrid, Manchester United, Benfica Lisbonne na Ajax zizakina ku wa Gatatu

Atlético de Madrid igiye gukina iri ku mwanya wa gatanu muri La Liga, aho irushwa amanota 15 na Real Madrid iri ku mwanya wa mbere.

Manchester United iri ku mwanya wa kane aho irushwa amanota 17 na Manchester City iri ku mwanya wa mbere muri Premier League.

Atlético de Madrid ifite agahigo keza ko kuba itaratsindirwa ku kibuga cyayo mu mikino ya UEFA Champions League kuva mu 1997. Yatsinze imikino icyenda inganya itanu muri 14.

Ku ruhande rwa Manchester United ni uko rutahizamu yibitseho, Cristiano Ronaldo amaze gutsinda ikipe ya Atletico Madrid ibitego 25.

Ikindi ni uko Ralf Rangnick utoza Manchester United uri bube ari umukino wa mbere wo gukuranamo atoje muri UEFA Champions League kuva mu 2011.

Benfica Lisbonne yo muri Shampiyona ya Portugal iri ku mwanya wa gatatu ikaba irushwa amanota 12 n’ikipe ya Porto iri ku mwanya wa mbere.

Ajax iri ku mwanya wa mbere muri Shampiyona ya Baholandi aho irusha PSV Eindhoven iyikurikira amanota atanu.

Ni umukino Ajax igiye gukina ifite rutahizamu, Sebastian Haller kuri ubu wabashije gutsinda igitego muri buri mukino wo mu matsinda.

Ni na we mukinnyi mu mateka ya UEFA Champions League umaze gutsinda ibitego bitandatu mu mikino 10 ya mbere yakinnye muri iri rushanwa.

Benfica Lisbonne yatsinze imikino ine mu icumi yayihuje n’amakipe yo mu Buholandi.