Ikipe y’Igihugu y’Umupira w’Amaguru “Amavubi” iri i Kigali nyuma y’urugendo yavuyemo I Cotonou, mu mukino w’Umunsi wa Gatatu wo mu Itsinda L ryo gushaka itike y’Igikombe cya Afurika kizaba mu mwaka utaha muri Côte d’Ivoire.

Abakinnyi bahise berekeza mu Bugesera muri La Palisse Hotel mbere y’umukino uzabera kuri Kigali Pelé Stadium.

Abakinnyi n’abayobozi ba FERWAFA baganiriye ku mpamvu zatuma bitwara neza bakabasha kubona itike y’Igikombe cya Afurika ruherukamo mu 2004.

Kapiteni w’ikipe y’igihugu Kagere Meddie, mu izina rya bagenzi be yasabye aba bayobozi kongera ibihabwa abakinnyi kugira ngo babashe kujya mu kibuga nabo banezerewe.

Yagize ati "Uko bimeze Perezida, twebwe nk’abakinnyi dufite amahirwe yo kujya mu Gikombe cya Afurika ariko akantu ko gutuma abakinnyi bishima (Motivation) karakenewe cyane."

Perezida wa Ferwafa, Nizeyimana Mugabo Olivier, yashimiye abakinnyi mu buryo bari kwitwara ndetse abereka ko mu bushobozi bwabo harimo buri kimwe cyatuma babona itike.

Ati "Mwese nk’ikipe turabishimiye ntacyo mutakoze. Kugira ngo izi mbaraga twatakaje mu mikino ibanza zigire akamaro ni uko mu ikurikira noneho dushyiramo imbaraga zindi tubone amanota atatu. Ibyo tubikoze biratugeza kuri CAN”.

Biteganyijwe ko umukino w’u Rwanda na Bénin uzaba kuwa Gatatu, tariki ya 29 Werurwe 2023 saa Cyenda kuri Kigali Pelé Stadium i Nyamirambo.

Perezida wa FERWAFA yijeje ubufasha abakinnyi b'Amavubi kugira ngo bitware neza

Abakinnyi b'Amavubi basabye kwitabwaho cyane kugira ngo batange umusaruro