Ikipe y’Igihugu yakomeje ibikesha igitego cyo hanze kuko umukino ubanza yari yatsindiwe muri Libya ibitego 4-1. Bisobanuye ko amakipe yanganyije ibitego 4-4 mu mikino yombi.

Amavubi U-23 yakoze ibitangaza byo gutsinda ibitego 3-0 mu gihe mbere y’uko umukino uba nta wizeraga ko ishobora kubikora kugera n’aho isezerera Libya yari yibitseho impamba y’ibitego bitatu mu mukino ubanza.

Abasore b’Ikipe y’u Rwanda iyobowe na Yves Rwasamanzi bashatse kwinjira mu mukino mbere ya Libya kuko basabwaga gusatira ariko yo yakinaga ituje irwana no kudatsindwa.

Ishimwe Annicet wari wabanje hanze mu mukino ubanza yagiriwe icyizere abanza mu kibuga ndetse byatumye Amavubi yitwara neza hagati mu kibuga kuko uyu musore yakoreweho amakosa menshi. Muri iyo hari aho yategewe inyuma y’urubuga rw’amahina, yatera umupira ugaca hejuru y’izamu.

Abasore b’u Rwanda bakinaga imipira miremire bashaka Gitego Arthur wakinaga asatira ku ruhande rw’u Rwanda. Mu minota 15 ya mbere byabahiriye kuko binjiye mu mukino mbere ya Libya.

Ishimwe Annicet afatanyije na Nyarugabo Moïse bagoye cyane abasore ba Libya nka Ashraf wakinaga ku ruhande rw’iburyo.

Libya na yo yanyuzagamo igasatira ariko icungiye ku mipira yihuta ndetse ku munota wa 21, abakinnyi bayo babonye amahirwe akomeye ariko Islam Elghannay umupira awutera hanze y’izamu rya Hakizimana Adolphe.

U Rwanda rwakomeje gusatira Libya ndetse biza kuruhira kuko ku munota wa 37, Kapiteni w’Amavubi U-23, Niyigena Clement yafunguye amazamu ku gitego yatsindishije umutwe nyuma y’umupira yahawe na Kamanzi Ashraf wari umaze guhana ikosa ku mupira w’umuterekano.

Ikipe ya Libya yibonye mu mukino imaze gutsindwa igitego cya mbere nayo itangira gusatira izamu ry’ikipe y’u Rwanda. Ku munota wa 40, Nuradin Elgraib abona ubundi buryo bwiza bwari kuvamo igitego, gusa umupira ujya hanze.

Iminota 45 yarangiye u Rwanda ruri imbere n’igitego 1-0, bivuze ko rwasabwaga ibitego bibiri kugira ngo rusezerere Libya, rukomeze mu kindi cyiciro.

Igice cya kabiri cy’uyu mukino cyatangiye Libya ishyira igitutu ku Rwanda ariko ntiyaje guhirwa kuko ku munota wa 52, yinjijwe igitego cya kabiri cyatsinzwe na Niyigena Clement.

Nyuma y’iki gitego, abafana kuri Stade ya Huye bahagurutse batiza umurindi abakinnyi kugira ngo u Rwanda rubone ikindi gitego cya gatatu, cyari nka zahabu kuri rwo.

Umutoza Yves Rwasamanzi yahise yinjiza mu kibuga rutahizamu Rudasingwa Prince asimbura Gitego Arthur mu gihe Hoziyana Kennedy yafashe umwanya wa Kamanzi Ashraf ku munota wa 56.

Ikipe ya Libya na yo yakoze impinduka ikuramo Tibe Muhamed ishyiramo Pusayin Taqtaq. Akigera mu kibuga yabonye amahirwe ku munota wa 58 ariko Bin Ali ashyira umupira hanze y’izamu.

Libya yarushijwe cyane hagati mu kibuga, yakoresheje impande cyane ariko biba iby’ubusa ntibyayiha umusaruro.

Ishimwe Annicet wari mu bihe bye byiza ku munota wa 71 yinjiranye umupira acenga ab’inyuma ba Libya bamukoreraho ikosa, umusifuzi atanga penaliti yinjijwe neza na Rudasingwa Prince.

Kuva kuri uwo munota, Abanyarwanda bari muri Stade ya Huye babyinnye karahava, mu gutiza umurindi ikipe yabo yari imaze gukora ibidashoboka.

Libya yibutse ibitereko yasheshe itangira kongera imbaraga mu mpande mu minota 10 ya nyuma ariko Ishimwe Jean René na Nshimiyimana Yunusu babifashijwemo na Ishimwe Clement bakomeza kwitwara neza mu bwugarizi.

Ku munota wa 83 ni bwo habonetse ikarita y’umuhondo ya mbere muri uyu mukino yahawe Nshimiyimana Yunusu kubera gutinza umukino.

Iri kosa ryavuyemo koruneri yatewe igakurwamo na Hakizimana Adolphe akabanza kugira imvune ariko idakanganye.

Umutoza Rwasamanzi wacunganwaga n’iminota ashaka no kugarira, yakoze impinduka akuramo Nyarugabo Moïse asimbura Nsabimana Denis ku munota wa 88.

Amavubi U-23 yagaragazaga inyota yo kubona ikindi gitego ndetse Ishimwe Annicet yateye umupira mu izamu ariko uca hejuru gato.

Mu minota ya nyuma, abasore ba Libya bari bashyushye mu mutwe ndetse bashaka no kurwana kubera ikosa ryakozwe na Nsengiyumva Samuel ariko abatoza n’abasifuzi batabara batarafatana mu mashati.

Umutoza Rwasamanzi yakoresheje amayeri yo gutinza umukino akura mu kibuga Hakim Hamissi ashyiramo Rutonesha Hesbon ku munota wa 95, mbere y’amasegonda make ngo urangire.

Nyuma y’intsinzi y’amateka imbere ya Libya, Amavubi U-23 azahura na Mali mu mukino ubanza uzakinwa ku wa 20 Ukwakira i Bamako mu gihe uwo kwishyura uzabera kuri Stade ya Huye ku wa 27 Ukwakira 2022.

Ikipe izakomeza hagati y’u Rwanda na Mali izakatisha itike yo gukina Igikombe cya Afurika kizabera muri Maroc mu 2023.

Abakinnyi babanjemo ku ruhande rw'u Rwanda

Abakinnyi babanjemo ku ruhande rw'Ikipe y'Igihugu ya Libya

Hakim Hamissi agerageza kuzibira abakinnyi ba Libya ngo batamena aho bamenera batera mu izamu rya Hakizimana Adolphe

Wari umukino w'ishiraniro hagati y'impande zombi

Amavubi U-23 yasezereye Libya mu gushaka itike y’Igikombe cya Afurika kizabera muri Maroc mu 2023

Gitego Arthur ahanganiye umupira mu kirere na mugenzi we wa Libya U-23

Uyu mukino wabereye kuri Stade ya Huye mu Majyepfo y'u Rwanda

Abakinnyi b'Amavubi banyuzagamo bagahererekanya neza umupira hagati mu kibuga

Ishimwe Annicet ari mu bakinnyi bitwaye neza kuri uyu mukino

Ishimwe Annicet agundagurana n'abakinnyi ba Libya

Ishimwe Annicet yabaye intwaro yafashije Amavubi U-23 kwitwara neza

Benshi mu bakinnyi bakiniye Amavubi U-23 ni ubwa mbere bahamagawe mu Ikipe y'Igihugu

Abakinnyi ba Libya banyuzagamo bakagora ab'Amavubi

Umunyezamu wa Libya U-23, Altihar yahuye n'akazi katoroshye muri uyu mukino

Hamissi Hakim w'u Rwanda yari yabaye ibamba

Ishimwe Annicet agerageza kunyura ku mukinnyi wa Libya washakaga kumwambura umupira

Ishimwe Annicet yumvana imitsi n'umukinnyi wa Libya

Kamanzi Ashiraf ahanganye n'umukinnyi wa Libya

Rutahizamu w'u Rwanda, Gitego Arthur yagoye ab'inyuma ba Libya mu gihe yamaze mu kibuga

Nyarugabo Moïse [ufite umupira] ashimira Niyigena Clement wari umaze gutsinda kimwe mu bitego byahesheje u Rwanda intsinzi

Ishimwe Annicet asanzwe akinira APR FC

Inshundura za Libya zanyeganyeze inshuro eshatu

Nyamurangwa Moses agerageza kunyuza umupira kuri mugenzi we wa Libya

Ishimwe Annicet yitanze bishoboka byose kuri uyu mukino

Nyarugabo Moïse yitwaye neza kuri uyu mukino

Nyarugabo Moïse agerageza gucuma umupira imbere asatira izamu rya Libya

Gitego Arthur yavundaga cyane imbere y'izamu rya Libya

Abasore b'Amavubi binjiye mu mukino bashaka gusatira cyane kuko ni cyo basabwaga ngo bakomeze mu kindi cyiciro

Abasore b'Amavubi U-23 basabwaga gukora ibidasanzwe kandi babikoze batsinda ibitego bitatu

Ishimwe Annicet yazamukanye umupira ageze mu rubuga rw'amahina akorerwaho ikosa ryavuyemo penalitiIshimwe Annicet yazamukanye umupira ageze mu rubuga rw'amahina akorerwaho ikosa ryavuyemo penaliti

Rudasingwa Prince ni we wahise ayifata. Aha yiteguraga gutera penaliti

Yayinjije neza...

Yishimiye igitego muri ubu buryo...

Rudasingwa Prince yishimiye igitego ari kumwe na mugenzi we Hoziyana Kennedy

Abafana b'Amavubi bari mu bicu bishimira intsinzi y'Ikipe y'Igihugu

Byari ibyishimo nyuma y'umukino u Rwanda rwakatishijemo itike yo gukomeza mu kindi cyiciro mu rugendo rugana mu Gikombe cy'Isi kizabera muri Maroc mu 2023

Byari ibihe by'akanyamuneza. Bongeye kumwenyura nyuma y'iminota 90 y'indyankurye

Amavubi azahura na Mali mu kindi cyiciro mu rugendo rugana mu Gikombe cya Afurika cy'Abatarengeje imyaka 23

Abakinnyi ba Libya bananiwe kwakira urwo baboneye i Huye

N'abatoza kwifata byabananiye kubera ibyababayeho

Nyuma y'umukino, abakinnyi ba Libya bubitse imitwe hasi batiyumvisha uko basezerewe n'u Rwanda bari batsinze ibitego 4-1 mu mukino ubanza wabereye muri Libya

Abakinnyi ba Libya basohowe mu kibuga barandaswe

Nyuma y'umukino bashimiye abafana bababaye hafi bakabatiza umurindi

Abafana bongeye kumwenyura nyuma y'igihe badaheruka intsinzi y'Amavubi

Amafoto: Uwase Alliah