Avuga impamvu ashaka kuva mu Budage, Pep Guardiola yagize ati:” Nshaka kuba mu wundi mujyi kandi ndashaka gutoza mu Bwongereza. Mfite amakipe menshi anshaka mu Bwongereza ariko nta n’imwe ndasinyana amasezerano na yo.”
Yakomeje agira ati:"Mfite amahirwe menshi yo gukorera mu Bwongereza kandi ndatekereza ko ari cyo gihe ku myaka yanjye kandi ni icyemezo cyiza. Iyo niyo mpamvu nafashe umwanzuro.”
Ku myaka 44, Guardiola ni umwe mu batoza bakomeye, bubatse izina kandi bahembwa amafaranga menshi kugeza ubu.
Nyuma yo gutangaza ko atazongera amasezerano mu ikipe ya Bayern Munich yari amaze imyaka itatu atoza mbere yo kuva mu ikipe ya FC Barcelona, amatsiko akomeje kuba menshi hibazwa aho yaba azerekeza uyu mwaka w’imikino nurangira.
Nubwo bivugwa ko yamaze kumvikana n’ikipe ya Manchester City, biracyashoboka ko ashobora no kujya muri Manchester United aho umutoza wayo Louis Van Gaal atamerewe neza kubera gutsindwa, ndetse ashobora no kujya muri Chelsea yasezereye Jose Mourinho kuri ubu ikaba ifitwe na Guus Hiddink by’agateganyo.
Carlo Ancelotti wahoze atoza Real Madrid ni we uzamusimbura muri Bayern Munich akaba yaramaze no gushyira umukono ku masezerano y’imyaka itatu. Guardiola akaba yavuze ko ari icyemezo cyiza ikipe yafashe kuko asanga Ancelotti ari we mutoza wari ukwiriye kumusimbura.
Ibigwi bya Pep Guardiola
Mu myaka ine yatoje FC Barcelona yayihesheje ibikombe 13 harimo bitatu bya shampiyona na bibiri bya champions League.
Mu myaka itatu atoza Bayern Munich yayihesheje ibikombe bibiri bikurikirana bya shampiyona ariko ananirwa kuyigeza kuri Champions League.
TANGA IGITEKEREZO