Igikombe cy’Isi uyu mwaka kizayoborwa n’abasifuzi 36 bo hagati mu kibuga na 63 bo ku ruhande.

Hatoranyijwe abeza kuri buri mugabane, harimo batandatu bazaba bahagarariye Afurika mu bo hagati n’icumi bo ku mpande.

Nk’uko tubikesha ikinyamakuru Marca cyo muri Espagne, abasifuzi bazasifura igikombe cy’Isi, bashyizwe mu byiciro bitewe n’uburambe bafite; mu cya mbere buri umwe azahabwa ibihumbi 57 by’amayero (asaga miliyoni 55 Frw) yo kwitabira akongerwa n’ibihumbi 2,500 by’amayero (asaga miliyoni 2 Frw) kuri buri mukino asifuye.

Abasifuzi bungirije, buri umwe azahabwa ibihumbi 20 by’amayero yo kwitabira (asaga miliyoni 19 Frw), ajye anahabwa amayero 1600 (asaga miliyini 1.5 Frw) kuri buri mukino asifuye.

Umushahara w’abasifuzi muri iri rushanwa wariyongereye kuko mu gikombe cy’Isi giheruka mu 2014, abasifuzi 10 batahanye menshi kuko bayoboye n’imikino myinshi bahawe amayero ibihumbi 43260 (asaga miliyoni 42 Frw).

Kuki umusifuzi ahabwa agaciro cyane mu gikombe cy’Isi?

Mu minota 90 y’umukino ishobora no kwiyongera bitewe n’impamvu zitandukanye, umusifuzi umwe hagati mu kibuga na babiri bamwungirije ibumoso n’iburyo, baba bafite akazi gakomeye ko kugenzura abakinnyi 22 bari gukina, ibikorwa by’abatoza bari hanze ndetse n’urusaku rwinshi rw’abafana ibihumbi, kenshi baba batanemera ibyemezo byabo babivugiriza induru kuko wenda bitari mu nyungu z’ikipe bafana.

Rimwe na rimwe umusifuzi ashobora kwibeshya ahanini bitewe n’umuvuduko umukino uba uriho, amakosa amwe ntabashe kuyabona cyangwa agasifura ikosa ritabaye,

Hari n’abasifuzi bamwe bagishyirwa mu majwi kuba barirengagije nkana, bagafata ibyemezo byahinduye burundu igikombe cy’Isi.

Mu gikombe cy’Isi cya 2006, mu mukino wa 1/8, u Butaliya bwahuye na Australia mu mukino utari woroshye, ku munota wa 50, Marco Materazzi abona ikarita itukura ku ruhande rw’Abataliyani amakipe yombi akinganya 0-0, bigera ku munota wa 90 nta n’imwe ibashije kubona igitego.

Umusifuzi yashyizeho iminota itanu y’inyongera ariko mu gihe nta gitego cyari kubonekamo hari gushyirwaho indi 30 ya kamarampaka. Abakinnyi b’u Butaliyani bari bananiwe kubera gukina ari bake ndetse no gusimbuza byarangiye kuri bo.

Ya minota itanu y’inyongera igiye kurarangira, myugariro wo ku ruhande rw’ibumoso w’u Butaliyani, Fabio Grosso, yaguye mu rubuga rw’amahina avuga ko Lucas Neill yamukuruye, umusifuzi atanga penaliti iterwa neza na Francesco Totti, u Butaliyani bukomeza muri ¼ ndetse bwegukana icyo gikombe nubwo kugeza n’ubu ikosa ryavuyemo penaliti ritavugwaho rumwe.

Ikindi gitego cyasigaye mu mateka cyatsinzwe mu gikombe cy’Isi kikanahindura byinshi habanje kubaho ikosa ni icya Diego Maradona mu 1986 yatsindishije akaboko, Argentine isezerera u Bwongereza muri ¼ ku bitego 2-1.

Icyo gitego Maradona yatsinze ku munota wa 51 yagikurikije ikindi ku munota wa 55 na cyo cyagiye mu mateka kuko cyatowe nk’igitego cy’icyinyejana kubera uburyo yabanje gucenga abakinnyi batandatu b’u Bwongereza.

U Bwongereza bwaje kubona igitego cy’impozamarira ku munota wa 81 cya Gary Lineker busezererwa gutyo, Argentine ikomeza muri ½ ndetse yegukana icyo gikombe cyari cyabereye muri Mexique itsinze u Budage 3-2.