Ubwo Minisitiri w’imari n’igenamigambi Dr Uzziel Ndagijimana, yamurikiraga Inteko Ishinga Amategeko, ingengo y’imari ya 2018/19, yagaragajemo imishinga itandukanye Guverinoma iteganya gukora mu rwego rwo kurushaho guteza imbere imibereho myiza y’abaturage.

Muri iyo mishinga harimo n’uwo kubaka stade z’uturere twa Bugesera, Ngoma na Nyagatare uzatwara miliyari 3,7 z’amafaranga y’u Rwanda, stade zizaba zifite ubushobozi bwa kwakira abantu bagera ku bihumbi bitatu buri imwe kandi zikazakoreshwa n’abakina imikino itandukanye.

Imirimo yo kubaka izi stade yatangiriye mu karere ka Bugesera tariki ya 1 Kanama 2018, aho biteganyijwe ko imirimo yo kubaka aho abafana ibihumbi bitatu bazicara izarangira hakurikireho icyiciro cyo kubaka ibibuga birimo icy’umupira w’amaguru cy’ubwatsi, Tennis, imikino ngororamubiri, Basketball na Volleyball.

Ikibanza cya stade ya Bugesera kigizwe n’ibibuga amazu arimo urwambariro rw’abakinnyi, inzu izakoreramo abaganga bakora ubutabazi bw’ibanze, icyumba kizakoreshwa mu nama cyangwa ibiganiro n’abanyamakuru, parikingi y’ibinyabiziga by’abitabiriye imikino n’ibindi.

Stade Regional ya Bugesera izubakwa mu gihe kingana n'amezi 10 izaba yuzuye tariki 28 Nyakanga 2019.

Amafoto: Ntare Julius