Ni igikorwa cyaranzwe no kwereka abatoza b'abana imitoreze n'uburyo bw'imikinire bukwiye gukurikizwa bijyanye n'imiterere y'abakinnyi b'Abanyarwanda, ibi akaba ari yo gahunda yafashwe mu gihe cy'imyaka ine Ferwafa iteganyiriza umupira w'amaguru w'abakiri bato mu Rwanda.

Yakurikijeho kwereka abana uko ruhago ikinwa ndetse no kuganira na bo agamije kubakundisha umupira w'amaguru.

Aganira n'itangazamakuru, Gérad Buscher yavuze ko ari gusura amarerero atandukanye y'umupira w'amaguru mu gihugu hose kugira ngo abafashe kuzamura urwego rw'umupira w'amaguru mu bana.

Yagize ati "Maze amezi atarenga abiri ndi umuyobozi wa tekinike muri Ferwafa aho nashoboye gukurikirana shampiyona y’icyiciro cya mbere, nkavugana n’abatoza ndetse nkabonana n’abayobozi ba siporo mu byiciro bitandukanye."

"Gusa buri wa Gatanu w’icyumweru ngerageza gusura amarerero y’umupira w’amaguru ariko henshi nageze nta bikoresho bihagije bafite mu gihe n’ababatoza nta bumenyi buhagije bafite."

"Nakunze uko hano muri Gasabo Gorilla Football Academy ubona ko bafite ibikoresho byuzuye ndetse n’abatoza babo bafite ibyangombwa n'ubushobozi bwo gutoza abana."

Irerero rya Gasabo Gorilla Football Academy ryatangiye mu 2016; rifite abana 105 riracyakira n'abandi bifuza kuzamura impano zabo mu mupira w'amaguru. Rifite abatoza batatu bafite License C ndetse n'abakozi babiri bashinzwe gucunga ibikoresho by'ikipe ndetse rikaba rinafite na Team Manager ureberera ubuzima bwa buri munsi bwaryo.

Umwihariko w'iri rerero ni uko ritoza abana mu ndimi zose cyane cyane Igifaransa n'Icyongereza,
rifite ibyiciro byose abari munsi y'imyaka 6, munsi y'imyaka 10, munsi ya 12, munsi ya 15, ndetse no munsi ya 17 abahungu n'abakobwa.

Iri rerero kandi mu ntego rifite ni uko abana barererwamo bagomba gukina ku rwego rwo mu gihugu ndetse n'urwego mpuzamahanga kuko bakina amarushanwa yo mu Rwanda no ku yindi migabane. Iryo baherukamo ni iryabereye ku mugabane wa Aziya mu mujyi wa Dubai ryitwa Dubaï Super Cup muri Mata 2017, ryahuje amarerero avuye ku migabane yose y'isi.

Uretse icyorezo cya COVID-19 cyashegeshe ibikorwa by'umupira w'amaguru ridasize na Gasabo Gorilla Football Academy, iri rerero rikaba rifite gahunda yo gukomeza kwitabira andi marushanwa mpuzamahanga mu minsi iri imbere.

Amafoto: Ntare Julius