Ibi byabaye nyuma y’umukino ubanza wa CAF Champions League wabereye kuri Kigali Pelé Stadium, ku wa Gatatu, tariki ya 1 Ukwakira 2025, Pyramids FC imaze gutsinda APR FC ibitego bibiri bya Fiston Kalala Mayele.

Umwe mu bari bakurikiye uyu mukinnyi ni Jesus Ducapel Moloko ukinira AS Kigali, wari mu byishimo bidasanzwe byo kongera guhura n’inshuti ye ya kera bahoranye muri Yanga SC yo muri Tanzania.

Umukino urangiye Mayele yahaye umwambaro we Ducapel, ariko nanone uyu mukinnyi ukina muri Shampiyona y’u Rwanda amusanga ku rwambariro ari kumwe na bagenzi be baturuka muri Repubulika Iharanira Demokarasi ya Congo (RDC).

Mayele yasabwe amafaranga n’aba, akura 200$ mu gakapu yari afite nk’uko bigaragara mu mashusho yafashwe n’umunyamakuru wa RBA, Rugaju Reagan.

Ducapel yashyize umucyo ku cyatumye ahabwa aya mafaranga, agaragaza ko kwari ukorohereza bagenzi be bamusabye ko yababwirira inshuti ye ikabasigira amafaranga.

Ati “Ni inshuti yanjye cyane kuva twatangira gukina. Rero ubwo nari kuri stade hari Abanye-Congo bagenzi banjye bifuzaga amafaranga ku muvandimwe wanjye, bansaba kubafasha. Rero namubwiye icyifuzo cyabo, mbasabira amafaranga.”

“Bamwe bakoresheje ariya mashusho baramparabika kugira ngo bangize isura yanjye. Mu by’ukuri ndamutse nkeneye n’ubufasha bwe sinabumwakira ku karubanda cyangwa muri buriya buryo. Ni inshuti yanjye, azi urwego rwanjye n’ubumuntu mfite.”

Mokolo w’imyaka 27 yakiniye amakipe atandukanye mbere yo kugera muri AS Kigali. Yavuye muri AS Vita Club yo muri RDC mu 2021, yerekeza muri Yanga SC yo muri Tanzania, ahava ajya muri Al Sadaqa na Diyala zo muri Iraq, mbere yo kujya muri ES Mostaganem yo muri Algeria.

View this post on Instagram

A post shared by Rugaju Reagan (@rugajureagan)

Jesus Moloko yavuze ko yasabiye amafaranga bagenzi be Fiston Mayele

Fiston Mayele yahaye umwambaro we Jesus Moloko

Jesus Ducapel Moloko wakiniye Yanga SC ubu akinira AS Kigali