Kuri uyu wa Gatanu tariki 7 Ukuboza 2018 nibwo uyu rutahizamu Rayon Sports yavanye muri Sousa Esporte Clube yo muri Brésil yabonye ibyangombwa bitangwa n’Urwego rw’Igihugu rushinzwe abinjira n’abasohoka rwemerera abanyamahanga gukorera mu Rwanda.

Yahawe iki cyangombwa avuye mu myitozo ibanziriza iya nyuma ikipe ye yakoze yitegura umukino w’umunsi wa karindwi wa shampiyona y’u Rwanda ‘AZAM Rwanda Premier League’ bazahanganamo na AS Kigali ku Cyumweru tariki 9 Ukuboza 2018 saa 15:30 kuri Stade ya Kigali.

Umutoza we Roberto Oliveira Gonçalves do Carmo yabwiye IGIHE ko uyu mukinnyi abonye ibyangombwa byuzuye bimwemerera gukina shampiyona y’u Rwanda yazamushyira mu bakinnyi 18 azakoresha ku Cyumweru.

Ati “Ni rutahizamu mwiza. Sinari nsanzwe muzi ariko nakunze uburyo bwe bw’imikinire n’inyota y’igitego ahorana. Ni umukinnyi w’umuhanga ariko ugikeneye gukora cyane kuko aracyabura imbaraga z’umubiri kuko yari amaze iminsi adakora. Bishobotse akabona ibyangombwa byose nazamukoresha mu mukino wa AS Kigali nta kabuza.”

Da Silva yabonye icyangombwa kimwemerera gukorera mu Rwanda (work permit) ariko ntabwo arabona icyangombwa cya FERWAFA kimwemerera gukina shampiyona y’u Rwanda kuko ikipe yavuyemo itaramurekura muri ‘system’ ya FIFA ikoreshwa mu guhererekanya abakinnyi (FIFA International market system) ariko biteganyijwe ko bikorwa mu ijoro ryo kuri uyu wa Gatanu.

Iyi myitozo Rayon Sports yakoreye ku kibuga cy’umuterankunga wayo ‘Skol Brewery Ltd’ mu Nzove yitabiriwe n’abandi bakinnyi bose harimo n’abatemerewe gukina uyu mukino nka Bimenyimana Bonfils Caleb wahanwe na FERWAFA na Donkor Prosper Kuka wujuje amakarita atatu y’umuhondo.