Wari umukino wa nyuma kuri Gor Mahia mbere yo guhaguruka kuwa Kane bajya muri CECAFA Kagame cup izabera i Dar Es Salaam muri Tanzania. Sibomana Abuba, Kagere Meddie na Nizigiyimana Kharim babanje mu kibuga.

Ku munota wa 28, Erick Johanna wa Mathare United yatsinze igitego cyishyuwe mu gice cya kabiri na Kagere Meddie, igitego cya 10 atsinze muri shampiyona. Jesse Were wa Tusker niwe ufite byinshi 13 akurikiwe na Michael Olunga wa Gor Mahia watsinze 12.

Kagere Meddie yagomboye igitego cya Mathare United, igitego cya 10 atsinze muri shampiyona

Ku nshuro ya mbere ageze muri Sofapaka, Hategekimana Aphrodis “Kanombe” yasimbuye, Ndayisenga Fuad abanza mu kibuga batsindwa na KBC ibitego 2-0.

Ku munsi wa 18 wa shampiyona ya Kenya, Gor Mahia iyoboranye amanota 46 ikurikiwe na Sofapaka ifite 34.

Muri Tanzania, Mugiranenza Jean Baptiste “Migi” ari mu mwiherero wa AZAM FC mu mujyi wa Tanga muri Tanzania wo gutegura CECAFA Kagame cup izatangira tariki ya 18 Nyakanga 2015.

Migi mu mwiherero wa AZAM FC mu mujyi wa Tanga bategura CECAFA Kagame cup

Kuwa Gatandatu, Migi yakinnye mu mukino wa gicuti batsinda Africa Sports igitego 1-0 cya John Bocco, ku Cyumweru abanza ku ntebe y’abasimbura batsinda Coastal Union igitego 1-0 cya Ally Zungu.

Gor Mahia iri mu itsinda A na Yanga yo muri Tanzania bazahura ku mukino ubanza wa CECAFA tariki ya 18 Nyakanga naho AZAM FC ihure na KCCA ya Uganda ku Cyumweru.