Ku wa Gatanu, tariki 5 Gicurasi 2023, ni bwo ibi bikoresho bifite agaciro ka miliyoni 4 Frw byahawe Ishuri ryigisha Ruhago rya Ruli riherereye mu Karere ka Gakenke, mu Murenge wa Ruli mu Kagari ka Gikingo rikaba rikinira ku Kibuga cya Gataba.

Ibi bikoresho bigizwe n’imipira 30, ama-corners mato 60, amanini 10 na Mannequins enye n'imyenda yo kwambara y'ubwoko butandatu bunyuranye.

Kamoso w’imyaka 23 afite umushinga wo kuvugurura iki kibuga akagishyiraho ubwatsi bugezweho bwa synthétique.

Aganira na IGIHE, Kamoso yatangaje ko yatangije iri rerero rikubiyemo abahungu n'abakobwa kugira ngo afashe abana bo mu cyaro kugaragaza impano zabo za ruhago zikaba zabatunga.

Yagize ati "Ruli Football Academy nayitangije kugira ngo abana bo mu cyaro bafite impano kandi zabagirira akamaro zibe zabatunga n’imiryango yabo. Mbabwira kenshi ko umupira w’amaguru udakinirwa i Kigali gusa ko na bo bishoboka ko bakinira amakipe akomeye haba muri Afurika no ku Mugabane w’u Burayi.”

"Tugerageza kubafasha haba mu bikoresho ndetse no mu bujyanama, ibyo tumaze kubaha ntibihagije tuzajya dukomeza tubafashe uko ubushobozi buzagenda buboneka. Imyambaro ntihagije ndetse bakeneye n'inkweto kuko badafite ubushobozi bwo kwigurira izabo. Ibyo byose biri muri gahunda. Ikibuga na cyo cyarangiritse, dufatanyije n'abafatanyabikorwa bacu mu minsi iri imbere tuzagishyiramo ubwatsi bw'ubukorano."

Yakomeje avuga ko yatangije iri rerero kugira ngo arinde aba bana kwishora mu biyobyabwenge no guta ishuri mu rwego rwo kubaremamo icyizere cy'ahazaza.

Yagize ati "Iri rerero naritangije mu 2020, duhera ku bana bafite imyaka itandatu kugera kuri 19. Mu kugerageza gufasha abana kuba bakina umupira tukabategura mu mutwe tukanabashishikariza kwiga no kwirinda ibiyobyabwenge nk’imbogamizi yatuma ubuzima bwabo bwangirika bakaba batakaza icyizere cy’ejo hazaza. Tubafasha kwigirira icyizere cyo kuba bazavamo abakinnyi beza.”

Kamoso Sylvestre yatangiriye impano ye muri Dream Team mu Mujyi wa Kigali mu 2012, akomereza muri Heroes FC yakinnyemo umwaka umwe hagati ya 2015/16 mbere yo kujya mu Bushinwa mu Cyiciro cya Gatatu mu Ikipe ya Nanjing FC hagati ya 2017/19.

Kamoso yakomereje mu igeragezwa muri Dynamo Kiev yo mu Cyiciro cya Mbere muri Ukraine ari naho intambara yibasiye iki gihugu cyatewe n’u Burusiya yamusanze biba ngombwa ko iri geragezwa rihagarara.

Kuri ubu ari gukina mu Cyiciro cya Kabiri cya Shampiyona y’u Budage muri FC Braunschweig gusa akaba yaramaze kumvikana na SV Olympia92 Braunschweig ikina mu Cyiciro cya Gatanu muri iki gihugu ari naho azakina umwaka utaha w’imikino wa 2023/24.

Amafoto: Ntare Julius