Muri Gashyantare 2026, ni bwo hatangiye imirimo yo kuvugurura iyi Stade ya Kigali yitiriwe umunyabigwi w’Umunya-Brésil, Edson Arantes do Nascimento ‘Pelé’, witabye Imana ku wa 29 Ukuboza 2022.

Mu by’ingenzi byavuguruwe kuri iyi stade yakira abantu ibihumbi birindwi, harimo umwanya uri hafi y’ikibuga, amarangi y’igisenge ndetse n’aho abafana bicara.

Hari ugukora amasuku muri stade imbere, mu myanya y’icyubahiro n’indi yose isigaye, gutunganya birushijeho urwambariro n’umwanya wagenewe abanyamakuru.

Hari intebe zicarwaho n’abasimbura n’abatoza zahinduwe, hashyirwamo inshya zigezweho, amazamu ndetse n’inshundura na byo birahindurwa.

Ucyinjira muri Kigali Pelé Stadium uhita ubona ko izaberaho imikino ya FIFA Series 2026 izabera mu Rwanda bwa mbere, kuko ibirango biri mu mabara yayo biri hose.

Mu buryo budasanzwe, hashyizweho ibyuma by’ikoranabuhanga byagenewe kwamamaza ku kibuga bizwi nka ‘LED Screens, bizajya binyuzwaho abaterankunga n’abafatanyabikorwa b’iri rushanwa.

Icyari gitegerejwe cyane kuri iyi stade ni ugutunganya ibirebana n’ibibazo by’amashanyarazi, ndetse Perezida w’Ishyirahamwe rya Ruhago mu Rwanda, Shema Ngoga Fabrice, yavuze ko cyakemutse burundu.

Ati “Cyarakemutse burundu. Cyari ikibazo cya ‘installation’ imaze imyaka myinshi nanjye ntazi uko ingana. Ikibazo rero cyari insinga za kera zageze aho zirananirwa ubu rero barazihinduye.”

Kuri Kigali Pelé Stadium haratangira gukinirwa imikino yo mu Itsinda B rya FIFA Series 2026. Kuri uyu wa Kane, tariki ya 26 Werurwe, Aruba irahura na Macau, Saa Saba n’Igice, naho Tanzania ikine na Liechtenstein, Saa Kumi n’Igice.

Aho abakinnyi banyura bava mu rwambariro hameze neza mu buryo budasanzwe kuri Kigali Pelé Stadium

Umwanya wahariwe abatanga ibiganiro ku bakinnyi n'abatoza bavuye mu kibuga

Mu myanya isanzwe hatatswe ibirango bya FIFA Series 2026

Ikibuga cyo gukiniraho ntabwo cyahindutse

Buri hamwe hakozwe amasuku

Ibyuma birinda abafana kujya mu kibuga na byo byashyizweho

Ibyapa byamamaza na byo byashyizwe ku nkengero z'ikibuga

Kigali Pelé Stadium yavugururiwe kwakira imikino y'Itsinda B rya FIFA Series 2026

Inshundura ni nshya ugereranyije n'izisanzwe

Ikibazo cy'amashanyarazi yo kuri Kigali Pelé Stadium cyarakemutse burundu

Igisenge cya Kigali Pelé Stadium cyasizwe amarangi mashya

Kigali Pelé Stadium iri mu bibuga biberaho imikino mpuzamahanga mu Rwanda

Iruhande rw'ikibuga hashyizweho 'tapis'

Icyapa kirangira abantu aho ubwiherero buherereye

Amakipe azakinira kuri Kigali Pelé Stadium amaze iminsi ari kuhitoreza

Ahicara abatoza, abasimbura n'abasifuzi na ho haravuguruwe

Ukibona Kigali Pelé Stadium ubona ko amarangi ari mashya

Kigali Pelé Stadium itatse ibirango bya FIFA Series

Ahicara abanyacyubahiro hashyizwemo intebe zihagije

Imyanya y'icyubahiro yaratunganyijwe neza

Amafoto: Umwari Sandrine