Kuri iki Cyumweru, tariki ya 30 Kanama 2026, ni bwo kuri Kigali Pelé Stadium, hakiniwe umukino wa nyuma w’irushanwa rihuza amakipe yitwaye neza mu mwaka wa 2025/26, nubwo nta n’imwe yatwaye igikombe na kimwe mu bikomeye bikinirwa mu Rwanda, yaba icya Shampiyona n’icy’Amahoro.

Myugariro wa Police FC, Nsabimana Eric, wavunikiye mu mukino wa 1/2 basezerera Rayon Sports, ntabwo yakinnye umukino wa nyuma wabahuje na Kiyovu Sports.

Nyuma yo gutsinda Gasogi United FC mu bujurire igategekwa kumuha ibaruwa imurekura, Hakim Hamiss ukina mu kibuga hagati yari mu bakinnyi bifashishijwe na Kiyovu Sports kuri uyu munsi.

Ugereranyije n’imikino amakipe yombi yakuyeho itike zo gukina uyu mukino wa nyuma, uyu mukino wagendaga buhoro cyane, kuko nta n’imwe yageragezaga kugera imbere y’izamu kenshi ngo ishake igitego.

Igice cya kabiri cyatangiranye imbaraga, ariko Kiyovu Sports isatira cyane Police FC, ihita ibona n’amahirwe akomeye ku ishoti rikomeye ryageragejwe na Hamis Hakim ku munota wa 49, ariko rinyura hejuru y’izamu gato.

Nyuma y’umunota umwe gusa Police FC yahise igera imbere y’izamu ry’Urucaca ibona koruneri yavuyemo akavuyo, Kwitonda Alain atera ishoti mu izamu rikurwamo n’umunyezamu wa Kiyovu Sports, James Desire.

Umutoza wa Kiyovu Sports, Harrison Mark Simon, yakoze impiduka mu kibuga akuramo Lola Kanda Moise, Shaba Kagayo na Rwabuhihi Placide, ashyiramo Mugisha Didier, Gihozo David na Avit Nkundimana.

Ni mu gihe Rkyek Jaafar utoza Police FC yakuyemo Tangara Keffa, Iradukunda Simeon na Luc Bide Ndohoungar ashyiramo Ingabire Chrisman, Ekeson Okorie na Manishimwe Djabel.

Ku munota wa 83 w’umukino, myugariro wa Kiyovu Sports Ntwali Asman yahinduye umupira mwiza mu rubuga rw’amahina, usanga Hakim Hamis ahagaze neza mu rubuga rw’amahina, aragarama ashyira umupira mu izamu atsinda igitego.

Iki gitego ni cyo cyahesheje intsinzi Kiyovu Sports, yegukana Igikombe cya FERWAFA Super Cup nubwo yabaye iya gatatu muri shampiyona y’umwaka ushize wa 2025/26.

Ishyirahamwe rya Ruhago mu Rwanda (FERWAFA) ritegura iri rushanwa ryagennye ko iyi kipe yatwaye iki gikombe izahabwa na miliyoni 40 Frw, mu gihe Police FC yo izahabwa miliyoni 20 Frw.

Yahize andi makipe arimo Mukura VS yasezereye muri ½, na Rayo Sports yari yasezerewe na Police FC.

Kiyovu Sports yaherukaga kwegukana igikombe mu mwaka wa 2022, ubwo yatsindaga Rayon Sports ibitego 2-1, ikegukana igikombe cya ‘Made in Rwanda Cup’.

Kigali Pelé Stadium yakiriye uyu mukino ariko nta wari kumenya ko yabereyeho umukino wa nyuma

Mbere y'uko umukino utangira abafana bari bake muri stade

Nsabimana Eric 'Zidane' wa Police FC ntiyakinnye uyu mukino

Abatoza ba Police FC bajya inama ku buryo bitwara mu mikino

Umutoza wa Police FC, Rkyek Jaafar, yinjiraye icyizere mu kibuga

Igikombe cya FERWAFA Super Cup cyakiniwe

Abatoza b'Amavubi bakurikiye uyu mukino wa Police FC na Kiyovu Sports

Rulisa Patience ni we wayoboye uyu mukino

Abakinnyi 11 Police FC yabanje mu kibuga

Abakinnyi 11 Kiyovu Sports yabanje mu kibuga

Kiyovu Sports na Police FC zakinnye igice cya mbere kidashamaje

Isaac Eze wa Police FC ari gusiga Lola Kanda Moise wa Kiyovu Sports

Richard Kirongozi ahanganye na Udahemuka Jean de Dieu

Richard Kirongozi wa Kiyovu Sports ari gushaka uko aca kuri Tangara Keffa wa Police FC

Hakim Hamiss yakinnye umukino wa mbere muri Kiyovu Sports

Udahemuka Jean de Dieu ahanganiye umupira na Richard Kilongozi wa Kiyovu Sports

Abafana ba Kiyovu Sports bagerageje kuyishyigikira mu gice cya kabiri

Umutima wari wahagaze ku bafana ba Kiyovu Sports bifuzaga igikombe

Kwitonda Alain 'Bacca' wa Police FC ari kugerageza gushaka uko atanga umupira

James Desire uri mu izamu rya Kiyovu Sports yayifashije cyane muri iri rushanwa

Ishimwe Jean Rene wa Kiyovu Sports afite umupira ari gushaka uwo awuhereza

Igitego cya Kiyovu Sports cyakuye mu bwigunge abafana bayo

Abakinnyi ba Kiyovu Sports bari guhabwa imidali

Visi Perezida wa kabiri wa FERWAFA, Mugisha Richard, ni we watanze igikombe

Kiyovu Sports yari inyotewe kubona igikombe

Kapiteni wa Kiyovu Sports, Mbonyingabo Regis, ari kwishimira igikombe

Amafoto: Umwari Sandrine