Kwizera wasoje amasezerano muri Rayon Sports, imikinire ye yo gukinisha amaguru cyane ntivugwaho rumwe cyane ko rimwe na rimwe imuviramo no gutsindwa ibitego.

Uyu munyezamu yasobanuye ko icyo aba yifuza iyo yatindanye umupira cyangwa ari gucenga uwamusatiriye.

Ati “Gukina mwubaka umukino ni wo mupira ugezweho. Niba mfashe umupira ukabona mugumanye amasegonda atanu ni uko mba nshaka ko bansatira bakava ku mukinnyi wanjye maze nkawumuha ari wenyine.”

Yakomeje agaragaza ko abafana bakwiye kumwakira kuko guhindura imikinire ye bigoye.

Ati “Ntabwo navuga ko ariwo muco w’imikinire yanjye (gutera imbere) kuko n’ibindi bashaka ko nkina nabikina ariko navuga ko imikinire yanjye ari iriya ndetse no kuyihindura byagorana ni yo mbigerageje nkora amakosa menshi.”

Yanavuze ko aba agamije gukora icyiza kugira ngo ikipe itsinde.

Ati “Mba nshaka ko dukore icyiza kugira ngo dutsinde, mbakurure baze bansatira maze umupira nywutange imbere dusatire turi benshi umubare wacu wiganze mu rubuga rw’ikipe duhanganye. Abantu bumve ko mba ngamije ko dutsinda.”

Ni ubwo bimeze bityo, Kwizera yagaragaje ko mu mikino yamubabaje mu buzima, ari igihe Amavubi atsindwa na Côte d’Ivoire. Ni mu gihe iyamushimishije ari imikino ibiri ya Cap-Vert cyane ubanza wabereye i Pria aho yitwaye neza cyane.

Kwizera Olivier yasabye abafana kwakira imikinire ye yo gukinisha amaguru cyane kuko ari wo mupira ugezweho