Kuwa Gatandatu shampiyona ya Espagne (La liga) yakomezaga ku munsi wayo wa Gatanu. Barcelona yatsinze Cadiz ibitego 4-0, Lewandowski atsinda igitego, anatanga imipira ibiri yavuyemo ibindi, iba intsinzi ya mbere kuva 2006 ya Barcelona yabonye kuri Cadiz.

Nyuma y’uyu mukino Atletico Madrid nayo yanyagiye Celta Vigo, ibitego 4-1. Ku Cyumweru tariki 12 Nzeri, nibwo Real Madrid yo yakinnye itsinda Mallorca ibitego 4-1 Antonio Rudiger atsinda igitego cye cya mbere muri iyi kipe.

Shampiyona y’Igihugu y’u Bufaransa (Ligue1) yakomezaga ku munsi wayo wa karindwi, Paris Saint Germain (PSG) na Marseille zikomeza kwitwara neza.

Kuwa Gatandatu PSG yatsinze Brest igitego 1-0, Neymar Junior watangiye neza uyu mwaka yatsindaga igitego cye cya 10. Marseille yakiraga Lille maze iyitsinda ibitego 2-1, harimo igitego cya Alexis Sanchez. Mu mukino wabaye kuri cyumweru, Monaco yatsinze Lyon ibitego 2-1.

Shampiyona y’u Budage, Bundesliga, nayo yarakomeje, Bayern Munich inganya umukino wa kabiri wikurikiranya. Kuwa Gatandatu, tariki 10 Nzeri 2022, ni bwo Bayern Munich yanganyije na Stuttgart ibitego 2-2.

Borussia Dortmund itsindwa na Leipzig ibitego 3-0 mu gihe Shalker04 nayo yatsindaga Bochum ibitego 3-1.

Shampiyona y’u Butaliyani nayo yarakomeje, AC Milan ikomeza kwitwara neza. Kuwa Gatandatu tariki 10 Nzeri, AC Milan yari yasuye Sampdoria maze iyitsindira iwayo ibitego 2-1, ikomeza kwiruka inyuma ya Napoli.

Napoli iyoboye urutonde rwa shampiyona kugeza ubu ku munsi wa Gatandatu, yatsinze Spezia igitego 1-0. Ku cyumweru Juventus yanganyije na Salernitana ibitego 2-2. AS Roma y’umutoza Mourinho irasura Empoli kuri uyu wa Mbere saa 20:45.

Shampiyona y’u Bwongereza, Premier League, ntiyakinwe mu mpera z’icyumweru gishize kubera guha icyubahiro Umwamikazi Elizabeth II watanze kuwa Kane w’icyumweru gishize.

Biteganyijwe ko amakipe azakina amarushanwa yo ku mugabane w’i Burayi muri iki cyumweru. Umukino uhatse indi uzaba muri UEFA Champions league, aho Bayern Munich izakira Barcelona kuwa kabiri tariki 13 Nzeri 2022.

Robert Lewandowski ntasiba gutsinda ibitego muri FC Barcelona

Neymar Jr yatsindaga igitego cya 10 muri uyu mwaka

Bayern Munich yanganyije umukino wa kabiri wikurikiranya

Antonio Rudiger yatsinze igitego cye cya mbere muri Real Madrid

AC Milan ikomeje kwitwara neza