Manchester United yongeye gutsindwa, isezererwa muri FA Cup

Nyuma yo gutakaza imbere ya Arsenal ku bitego 2-0 muri shampiyona, ikipe ya Manchester United yatsinzwe undi mukino yari yakiriwemo na Wolves ku wa Gatandatu muri ¼ cya FA Cup, itsindwa ibitego 2-1, ihita inasezererwa.

Mu yindi mikino yabaye muri iki gikombe, Watford yasezereye Crystal Palace iyitsinze ibitego 2-1, Swansea City itsindwa na Manchester City ibitego 3-2 mu gihe Brighton yasezereye Millwall kuri iki Cyumweru hitabajwe penaliti, nyuma yo kunganya ibitego 2-2.

Muri ½, Watford izahura na Wolves naho Manchester City ihure na Brighton & Hove Albion, imikino iteganyijwe tariki ya tariki ya 6 n’iya 7 Mata i Wembley.

Impera z’icyumweru zisize Chelsea bifashe igayitse, Liverpool yongeye gusiga Manchester City

Mu gihe abandi bakinaga FA Cup, Liverpool na Chelsea bo bakinaga shampiyona. Mu mukino utarabereye igihe, Everton yatsinze Chelsea ibitego 2-0, ikomeza kuyigabanyiriza amahirwe yo kuza mu makipe ane ya mbere uyu mwaka. Chelsea iracyafite amanota 57, irushwa inota rimwe na Manchester United ya gatanu, ikarushwa atatu na Arsenal ya kane.

Liverpool yo yongeye gusiga Manchester City amanota abiri, nyuma y’uko ikuye intsinzi kwa Fulham, iyitsinda ibitego 2-1 mu mukino wabaye kuri iki Cyumweru. Ikipe y’umutoza Jürgen Klopp yagize amanota 76 mu mikino 31 mu gihe Manchester City ifite amanota 74 mu mikino 30 bamaze gukina.

Juventus yatsinzwe umukino wa mbere muri shampiyona y’Ubutaliyani

Badafite Cristiano Ronaldo wari waruhukijwe nyuma yo kubafasha gusezerera Atlético Madrid muri Champions League, Juventus de Turin yatsikiye imbere ya Genoa, itsindwa ibitego 2-0.

Iyi kipe yari itaratsindwa na rimwe, ikomeje kuyobora shampiyona y’Abataliyani n’amanota 75 mu mikino 28 bamaze gukina.

Zinedine Zidane yongeye gutangira neza muri Real Madrid

Nyuma yo kubahesha ibikombe bitandukanye akaza kubasezera mu buryo busa n’ubwatunguye benshi, Zinedine Zidane wongeye kugirwa umutoza wa Real Madrid mu cyumweru gishize, yatsinze umukino we wa mbere.

Kuwa Gatandatu, Real Madrid yari yakiriye Celta Vigo, iyitsinda ibitego 2-0 byatsinzwe na Isco na Gareth Bale barenzwaga ingohe n’umutoza Santiago Solari wagiye. Iyi kipe iri ku mwanya wa gatatu n’amanota 54, irushwa amanota 12 na FC Barcelone ya mbere.

Messi yongeye kwigaragaza, atsinda ibitego bitatu

Mu mukino w’umunsi wa 28 wa shampiyona bari bakiriwemo na Real Betis, Lionel Messi yafashije FC Barcelone gutahukana amanota atatu, atsinda ibitego bitatu muri 4-1 batsinze, bakomeza kuyobora shampiyona n’amanota 66.

Messi akaba akomeje kuyobora abatsinze ibitego byinshi muri shampiyona ya Espagne (La Liga) n’ibitego 29. Iyi akaba ari hat-trick (ibitego bitatu mu mukino umwe) ya 33 uyu mukinnyi yatsindaga muri iyi shampiyona.

Mario Balotelli yari yiteguye gusonga abafana ba PSG ntibyamukundira

Ubwo ikipe ye ya Olympique de Marseille yari yakiriwe na Paris Saint-Germain kuri Parc des Princes kuri iki Cyumweru, rutahizamu mushya wa Marseille Mario Balotelli yari yateguye umupira uriho ifoto ya Marcus Rashford wa Manchester United, uheruka gutera penaliti yatumye iki kigugu cyo mu Bufaransa gisezererwa muri Champions League.

Balotelli ngo yari agamije kuza kwerekana iyi foto naramuka atsinze igitego PSG, gusa ntibyamukundiye kuko batsinzwe ibitego 3-1, we ntabone izamu.

PSG ikomeje kuyobora shampiyona y’Abafaransa n’amanota 77 mu mikino 28 mu gihe Marseille iri ku mwanya wa kane n’amanota 47 mu mikino 29.

David Ospina yataye ubwenge ari mu kibuga

Mu Butaliyani kandi ubwo Napoli yakinaga na Udinese, umunyezamu wa Arsenal watijwe Napoli, David Ospina w’imyaka 30, yataye ubwenge ubwo yagwaga mu kibuga ari wenyine, ajyanwa kwa muganga.

Ospina yari yabanje kugongana n’umukinnyi wa Udinese; Ignacio Pussetto, bamupfuka umutwe, akomeza gukina mbere yo kugira iki kibazo.