Manchester City yegukanye igikombe mbere y’uko yakira Chelsea FC biteganyijwe ko izakirira ku kibuga cyayo, Etihad Stadium, ku Cyumweru tariki 21 Gicurasi 2023.

Iki ni igikombe cya shampiyona cya gatatu iyi kipe yegukanye ndetse ni icya gatanu cyegukanywe na Pe Guardiola mu myaka itandatu ishize.

Uretse gutwara iki gikombe, Manchester City kandi ifite amahirwe yo kwegukana FA Cup [Izahura na [Manchester United] na Champions League [izacakirana na Inter Milan] kuko byombi ikibihatanira.

Manchester City ifite amanota 85 isigaje gukina imikino itatu ya Shampiyona y’Abongereza igeze ku munsi wa 37 irimo uwa Chelsea FC tariki 21 Gicurasi, Brighton & Hove Albion tariki 24, ikazasoreza kuri Brendford tariki 28 Gicurasi 2023.

Arsenal FC iri ku mwanya wa kabiri n’amanota 81 yo isigaje umukino umwe, uzayihuza na Wolverhampton Wanderers tariki 28 Gicurasi 2023.

Manchester City yegukanye iki gikombe kuko hagati yayo na Arsenal harimo ikinyuranyo cy’amanota ane mu gihe hasigaye umukino umwe ku Barashi b’i Londres. Bivuze ko n’iyo The Gunners yatsinda umukino utaha ntiyageza ku manota y’Abanyamujyi b’i Manchester.

Man City yegukanye Shampiyona y’Abongereza nyamara yararushwaga na Arsenal amanota umunani tariki 7 Mata 2023. Ni ku nshuro ya kane mu mateka y’iyi shampiyona ikipe yageze ku munsi wa 28 irusha iyikurikiye amanota umunani ariko ikayicaho ikayitwara igikombe.

Iyi kipe y’i Manchester yari ihagaze neza uyu mwaka dore ko yatsinze imikino 11 iheruka yikurikiranya ndetse yatakaje amanota abiri gusa muri 42 aheruka, mbere yo gutwara igikombe igikuye mu mitwe y’intoki za Arsenal yahabwaga amahirwe na benshi uyu mwaka w’imikino.

Taiwo Awoniyi yatsinze igitego cya Nottingham Forest ku munota wa 19. Ni cyo rukumbi cyabonetse muri uyu mukino wayihuje na Arsenal FC

Umutoza wa Arsenal, Mikel Arteta yababajwe no gutakaza umukino watanze igikombe

Stade ya Etihad yamaze gushyirwaho igitambaro cyerekana ko Manchester City yegukanye Igikombe cya Shampiyona

Abakinnyi ba Manchester City bafashe ifoto y'urwibutso mu mwiherero witegura Chelsea FC nyuma yo kwegukana Igikombe cya Shampiyona y'u Bwongereza

Ni ibyishimo ku bakinnyi ba Manchester City begukanye Igikombe cya Shampiyona

Manchester City yafashijwe cyane na rutahizamu Erling Braut Haaland umaze gutsinda ibitego 36 mu mikino 33