Ku wa Kane, tariki ya 16 Kamena 2023, hatangajwe amakuru y’uko ibiganiro bikomeje hagati y’Abanyamerika bafite Manchester United na Sheikh Jassim bin Hamad al-Thani ndetse biri gutanga icyizere.

Abakurikiranira hafi iby’aya makuru bagaragaza ko Sheikh Jassim ashobora gutangazwa nk’umuyobozi mushya w’ikipe ya Manchester United mu gihe cya vuba.

Mu Ugushyingo 2022 ni bwo Ubuyobozi bwa Manchester United Plc bwatangaje ko bwatangiye isesengura ku buryo bushya bwayifasha kuvugurura imikorere, aho bwahise bwitegura no kuyishyira ku isoko.

Iki ni igikorwa cyagaragaje ko kigiye gushyira iherezo ku ishoramari ry’Abanyamerika bagize Umuryango wa Malcolm Glazer umaranye iyi kipe imyaka 17.

Ku ikubitiro, Umuherwe wo mu Bwongereza Sir Jim Ratcliffe, abinyujije muri Sosiyete ye ya Ineos, yatangaje ko yinjiye mu rugamba rwo guhatanira kugura Manchester United.

Uyu mugabo wavukiye i Manchester, akaba n’umufana ukomeye wayo yahise abona undi mufana batangira guhanganira kwegukana iyi kipe, ukomoka muri Qatar.

Sheikh Jassim Bin Hamad Al Thani yemeye ko ari mu bashoramari bifuza kwegukana Manchester United akayisubaza icyubahiro cyayo, ubushongore ndetse n’ubukaka yahoranye nk’ikipe yegukana ibikombe.

Icyifuzo cya Jassim cyaje ari karundura kuko yashakaga kwegukana iyi kipe ayiguzemo imigabane yose. Abanyamerika bahise barakangarana ndetse ntibatinya no kuvuga ko batakiyigurishije.

Ibiganiro byongeye kubura mu gihe ikipe isoje Shampiyona iri mu yemerewe kujya muri UEFA Champions League mu mwaka utaha w’imikino.

Mu cyumweru gishize, Perezida wa Paris Saint-Germain umaze kumenyekana cyane mu ishoramari rya ruhago ku Mugabane w’u Burayi, Nasser Al-Khelaifi, yinjiye muri isoko ndetse bimenyekana ko yifuza kugira uruhare mu kugurwa kwa Manchester United.

Nyuma ye amakuru yamenyekanye ni uko ubusabe bwa Sheikh Jassim bwatangiye gusuzumwa n’ubushishozi ndetse icyizere cyo kubuha agaciro kikiyongera kurusha ubwa Ratcliffe.

Andi makuru avuga ko kugeza ubu icyifuzo cya Sheikh Jassim ari cyo kiri kurebwaho ndetse nta bundi busabe bugomba kwakirwa, ahubwo hagasuzumwa ubwe gusa nubwo hatazwi igihe isuzuma rigomba kumara.

Manchester United iragana ku gutera intambwe yo guca agahigo k’ikipe yagurishijwe amafaranga menshi, igihe yaba itanzweho miliyari $6 nk’uko ari gutangwa n’uyu muherwe.

Umuryango wa Malcolm Glazer, waguze Manchester United mu 2005, uyitangaho miliyari $1.

Abarabu bakomeje kugaragaza isura yabo ndetse n’akaboko mu gushora imari mu makipe y’i Burayi, harimo nka Qatar Sport Investments (QSI) ifite PSG yo mu Bufaransa na Public Investment Fund yo muri Arabie Saoudite ifite Newcastle United.

Sheikh Jassim yize mu Bwongereza, ni umuhungu w’uwahoze ari Minisitiri w’Intebe wa Qatar. Yabaye umufana wa Manchester United mu 1992, agifite imyaka 10. Yavuze ko afite inzozi zo gushora imari mu ikipe y’abagabo, abagore, kuzamura impano, kuvugurura stade ndetse n’ibibuga by’imyitozo.