Wari umukino usoza umukino umunsi wa gatatu wa shampiyona, wabaye kuri uyu wa mbere. Manchester united yagiye muri uyu mukino itarinjiza igitego mu gihe Liverpool nayo yari itaratsinda umukino.

Icya mbere cyatunguranye muri uyu mukino ni uko abakinnyi 11 babanje mu kibuga ku ruhande rwa Manchester United batarimo Cristiano Ronaldo na Harry Maguire, kapiteni w’iyi kipe mu gihe Liverpool itari ifite Darwin Nunez ufite ikarita y’umutuku na Thiago Alcantara wavunitse.

Manchetser United yatangiranye ishyaka ryinshi cyane ku munota wa 16 Jadon Sancho atsinda igitego cya mbere nyuma y’icyo Anthony Elanga yari amaze guhusha umupira ukubise igiti cy’izamu.

Igice cya kabiri cyatangiranye impinduka Anthony Martial asimbura Elanga, mu bikorwa bya mbere yakoze akigera mu kibuga, yatanze umupira kuri Marcus Rashoford nawe wari wigaragaje muri uyu mukino atsinda igitego cya kabiri ku munota wa 53.

Nyuma yo gutsindwa ibitego bibiri, Liverpool ntiyacitse intege kuko yakomeje irasatira ari nako umuzamu David DeGea wari witwaye nabi mu mukino ushize yongeraga kwibutsa uwo ariwe.

Nyuma y’iminota Liverpool yihariye umukino Mohammed Salah yaje kwishyura igitego kimwe ku munota 81.

Manchester United yakomeje kwihagararaho ba myugariro bashya Lisandro Martinez na Malacia bagaragaza umukino mwiza. Umukino warangiye Manchester United itsinze Liverpool ibitego 2-1.

Wabaye umukino wa mbere Manchester United itsinze mu gihe Liverpool yo itarabasha kubona amanota atatu imbumbe muri uyu mwaka w’imikino kuko yanganyije imikino ibiri ibanza.

Nyuma y’umukino umutoza wa Manchester United, Eric Ten Hag, yabwiye itangazamakuru ko atari amayeri yatsinze umukino ahubwo ari imyitwarire.

Yagize ati “Nashakaga uburyo bushya ndetse n’imyitwarire mishya. Rero ni byo abasore bazanye, twabasha gukinira ku gitutu kandi tugakina neza. Muri make gukina nk’ikipe n’umwuka mwiza ni byo twabonye uyu munsi.”

Yakomeje agira ati “Nishimiye imikinire y’uyu munsi ariko niko dukwiye guhora dukina kuko buri mukino wa Premier League uba ukomeye.”

Jurgen Kloop utoza Liverpool nyuma y’umukino yatangaje ko imipira y’imiterekano itabakundiye.

Yagize ati “Urebye ishyaka batangiranye wibwiraga ikiri bube, ntabwo twari abanyamahirwe kuko iyo imipira y’imiterekano idukundira twari kujya kuruhuka ari 1-1. Gutsindwa icya kabiri byo byahise biturangiza.”

Manchester United izongera gukina kuwa gatandatu isura Southampton, ikurikizeho Leicester city tariki 3 Nzeri 2022 mbere yo guhura na Arsenal.

Liverpool yo izakira Bournemouth kuwa Gatandatu na Newcastle kuwa Gatatu w’icyumweru gitaha mbere yo gukina Merseyside Derby na Everton tariki 3 Nzeri 2022.