Masudi wanyuze mu makipe atandukanye yo mu Rwanda arimo AS Kigali, Bugesera FC na Rayon Sports yahawe akazi ko gutoza Dodoma Jiji FC ku wa 24 Gashyantare 2022.

Kuva icyo gihe umusaruro we ntiwishimiwe ari na yo ntandaro yo gufata icyemezo cyo gutandukana na we nk’uko byatangajwe ku wa Mbere, tariki ya 10 Ukwakira 2022.

Masudi yasezerewe hamwe n’abandi batoza bakoranaga barimo Mohammed Muya wari umwungirije n’Umutoza w’Abanyezamu, Adam Meja bivugwa ko yerekeje muri Simba Queens yo muri Tanzania.

Ubuyobozi bwa Dodoma Jiji FC bwavuze ko agiye gusimburwa y’agateganyo na Omari Mohamed Omari usanzwe atoza amakipe y’abana.

Irambona Masudi yari yahawe akazi asimbuye Makata na we wirukanywe na Dodoma Jiji FC.

Uyu mutoza yatoje iyi kipe imikino 21, atsindwa 10, anganya itanu mu gihe yatsinze itandatu.

Umukino wa mbere yatoje wamuhuje na Ruvu Shooting ndetse warangiye amakipe anganyije igitego 1-1 mu gihe uwa nyuma yawukinnye na Simba awutsindwa ibitego 3-0.

Muri uyu mwaka w’imikino, Masudi yatoje Dodoma Jiji FC imikino itandatu, atsindamo umwe, anganya umwe mu gihe yatakaje imikino itatu. Kugeza ubu iyi kipe ayisize ku mwanya wa 14.

Nyuma yo kwirukanwa kwa Masudi, abatoza barimo Dyran Kerry [2015-2016] na Goran Kopunovic [2014-2015] banyuze muri Simba SC na Melis Medo wigeze gutoza Coastal Union bari mu batoza bahabwa amahirwe yo kumusimbura.

Umunyamabanga Mukuru wungirije wa Dodoma Jiji FC, Fredrick Mwakisambwe, yabwiye Mwanaspoti ko abatoza 20 basabye akazi mu ikipe.

Yavuze ko bari kureba mu myirondoro yabo ndetse “tuzatangaza umutoza tuzabana na we.’’

Amakuru aturuka muri Tanzania araha amahirwe Medo nk’ushobora gusimbura Masudi Djuma.

Uyu mugabo w’imyaka 45 yageze muri Dodoma Jiji FC nyuma yo gutandukana na Rayon Sports mu Ukuboza 2021, azira umusaruro muke.

Yagizwe Umutoza wa Rayon Sports ku nshuro ya kabiri muri Nyakanga 2021, ni nyuma y’uko yari yarayitoje hagati ya 2016 na 2017, ayifasha kwegukana Igikombe cy’Amahoro n’icya Shampiyona.

Masudi yageze mu Rwanda bwa mbere mu 1998, akinira APR FC imyaka ibiri mbere yo kwerekeza muri Kiyovu Sports.

Mu 2003 ni bwo yerekeje muri Rayon Sports maze mu 2004 ayifasha gutwara Shampiyona ubwo yatozwaga na Kayiranga Baptiste, nyuma ava muri iyi kipe yerekeza muri Seychelles mbere yo kugaruka mu bururu n’umweru mu 2006, agakina umwaka umwe.

Masudi yaretse gukina ruhago mu 2010 ari muri Inter Stars, agana mu butoza.

Rayon Sports ni yo kipe yabereye umutoza mukuru guhera muri Gashyantare 2016 ubwo yayisigaranaga nyuma y’igenda rya Ivan Minnaert, ayihesha Igikombe cya Shampiyona ya 2016/17 n’Igikombe cy’Amahoro cya 2016.

Nyuma yo gutandukana na Rayon Sports mu 2017, yabaye umutoza wungirije muri Simba SC mu mwaka w’imikino wa 2017/18, ahava asubira mu Rwanda mu mpeshyi, aho yagizwe Umutoza wa AS Kigali.

Yayibayemo amezi ane gusa, yirukanwa kubera umusaruro muke mu gihe yagiye muri Bugesera FC mu Ugushyingo 2019 nyuma yo kuva muri Bukavu Dawa yo muri Repubulika Iharanira Demokarasi ya Congo, ariko na yo ikaba itaramwongereye amasezerano ku mpera z’umwaka w’imikino wa 2019/20.

Ahandi yatoje ni muri Inter FC na Inter Star z’i Burundi, aho yari umutoza wungirije ndetse no mu Ikipe y’Igihugu y’u Burundi y’Abato yatoje mu 2015.

Masudi Irambona Djuma yirukanywe muri Dodoma Jiji FC yo muri Tanzania kubera umusaruro muke