Mohamed Wade yageze mu Rwanda tariki 17 Nyakanga 2023 aje kungiriza Umunya-Tunisia, Yameni Zelfani wari wahawe gutoza Rayon Sports mu gihe cy’umwaka umwe ariko bakaza gutandukana tariki 7 Ukwakira 2023 nyuma yo kubura itike igana mu matsinda ya CAF Confederation Cup ndetse no kutitwara neza mu mikino ya Shampiyona aho yari amaze kunganya itatu yikurikiranya.

Imbarutso yo gutandukana yabaye umukinnyi Gikundiro yanganyijemo na Marines FC ibitego 2-2 aho abafana batukanye n’umutoza imbonankubone. Ibi byatumye Zelfani ahitamo gusesa amasezerano na Rayon Sports asubira iwabo.

Ikipe yasigaranywe na Mohamed Wade wari usanzwe afite Licence C mu gihe yari ategereje Licence B.

Amakuru agera ku IGIHE yemeza ko Mohamed Wade yatsinze ikizamini cya Licence B ndetse ategereje ko izamugeraho mu Ugushyingo uyu mwaka.

Uyu mutoza amaze gutoza imikino ibiri ya Shampiyona aho yatsinze umwe wa Etoile de l’Est ibitego 2-1, atsindwa na Musanze FC, iyoboye Shampiyona, igitego 1-0 kuri Stade Ubworoherane.

Ubuyobozi butihutiye guhita bushaka undi mutoza bwahaye agahenge uyu Munya-Mauritania ngo bubanze burebe imyitwarire ye mu gihe azakira Sunrise FC tariki 21 Ukwakira mu gihe azakirwa na APR FC tariki 29 Ukwakira mbere yo gusura Etincelles FC tariki 4 Ugushyingo 2023. Mu gihe yaba yitwaye neza muri iyi mikino ashobora guhabwa amahirwe yo gukomeza gutoza ikipe.

Wade w’imyaka 37 yabaye umukinnyi wa ruhago akina inyuma ku ruhande rw’ibumoso, aho yakiniye amakipe arimo FC Nouadhibou, imwe mu zikomeye muri Mauritania.

Nyuma yo guhagarika gukina umupira w’amaguru, Mohamed Wade yagiye mu nzira yo gutoza aho ubunararibonye abifitemo ari ukuba Umutoza wungirije mu Ikipe ya ASAC Concorde, y’iwabo muri Mauritania ndetse na FC Nouadhibou yanakiniye, yatojwe na Yamen Zelfani, hagati ya 2015 na 2016 ubwo we yari akiri umukinnyi.

Umutoza wa Rayon Sports w'Agateganyo, Mohamed Wade, agorwa no kubona ubundi buryo bw'imikinire iyo Luvumbu byanze