Iri rushanwa ryasojwe ku Cyumweru, tariki 16 Kamena 2024 kuri Kigali Pelé Stadium ahakiniwe umukino wa nyuma mu mupira w’amaguru warangiye Ikipe y’Abasikare barinda abayobozi bakuru b’Igihugu (Republican Guard) yegukanye igikombe nyuma yo gutsinda Ishuri ry’Imyitozo ya Gisirikare rya Nasho ibitego 3-0.

Nk’ibisanzwe ubwitabire bw’iyi mikino buba buri hejuru na morale ikomeye iranga imifanire y’Ingabo z’Igihugu.

Uyu mukino wa nyuma muri ruhago wasoje indi wagaragayemo Umuyobozi w’abarinda abayobozi bakuru b’Igihugu, Maj. Gen. Willy Rwagasana n’Umuhungu wa Perezida Paul Kagame, Capt. Ian Kagame wakinaga mu bwugarizi.

Ni umukino kandi witabiriwe n’abayobozi batandukanye barimo Minisitiri w’Ingabo, Juvénal Marizamunda; Umugaba Mukuru w’Ingabo z’u Rwanda, Gen. Mubarakh Muganga; Umuyobozi Mukuru wa Polisi y’u Rwanda, CG Félix Namuhoranye na Perezida wa FERWAFA, Munyantwali Alphonse.

Muri rusange, iri rushanwa ryatangiye ku wa 15 Mata aho ryateguwe mu rwego rwo kwizihiza Umunsi wo Kwibohora ku nshuro ya 30, ryakinwe mu mikino itandukanye irimo umupira w’amaguru, Volleyball, Basketball, Netball, Handball, Kumasha n’Imikino Ngororamubiri.

Ryasojwe mbere kuko ryari gusozwa tariki ya 3 Nyakanga, umunsi umwe mbere y’Umunsi wo Kwibohora ariko yigijwe imbere kubera gahunda zirimo Amatora y’Umukuru w’Igihugu n’ay’Abadepite.

Uretse kwegukana igikombe mu mupira w’amaguru, Republican Guard yanacyegukanye muri Volleyball. Iyi kipe yiyongeraho Rwanda Military Academy Gako nayo yegukanye ibikombe bibiri ari byo Basketball na Handball.

Ikipe yabaye iya mbere mu Netball ni Rwanda Air Force naho iyabaye iya mbere mu Mikino Ngororamubiri ni General Headquarters, mu gihe BMTC Nasho yahize izindi mu kumasha.

Umugaba Mukuru w’Ingabo z’u Rwanda, Gen Mubarakh Muganga, yavuze ko iyi mikino igamije kwimakaza umuco wo gukora siporo no gukorera hamwe, mu gihe Minisitiri w’Ingabo, Juvénal Marizamunda yashimiye amakipe yitwaye neza, ashishikariza abasirikare gukomeza gukora siporo kuko ifasha byinshi mu buzima busanzwe no mu kazi ka buri munsi.

Abayobozi bakuru basuhuza amakipe yombi mbere y'umukino

Umuyobozi mu Ngabo z’u Rwanda ushinzwe guhuza abasivili n’abasirikare, Colonel Mugisha Vincent asuhuzanya na Capt. Ian Kagame

Umuyobozi Mukuru wa Polisi y’u Rwanda, CG Félix Namuhoranye asuhuzanya na Capt.Ian Kagame mbere y'umukino

Abakinnyi ba Republican Guard bishimira igitego cya mbere

Maj. Gen. Willy Rwagasana asuhuza bagenzi be nyuma yo kuva mu kibuga

Capt. Ian Kagame atera umupira imbere

Ndagijimana Peter ni umwe mu bakinnyi bazi umupira cyane

Republican Guard bishimira igitego cya gatatu

Muri iyi mikino ubwitabire buba buri hejuru

Ibikombe byahawe amakipe yahize andi muri iri rushanwa

Morale ni kimwe mu biranga iyi mikino

BMTC Nasho yahize abandi mu kumasha

Abasifuzi mpuzamahanga basifuye uyu mukino bahawe imidali

Akanyamuneza kari kose ku Umugaba Mukuru w'Ingabo, Gen Mubarakh Muganga na Capt. Ian Kagame

Republican Guard yambikwa imidali

Abakapiteni ba Republican Guard bashyikirizwa igikombe na Minisitiri w'Ingabo, Juvénal Marizamunda

Republican Guard bishimira igikombe begukanye muri ruhago

Umuyobozi Mukuru wa Polisi y’u Rwanda, CG Félix Namuhoranye atanga igikombe

Amakipe atandukanye yegukanye ibikombe yashimiwe

Perezida wa FERWAFA, Munyantwali Alphonse atanga imidali ku bahize abandi mu mikino ngororamubiri

Abatakinnye bafana bagenzi babo

Imifanire iba iri ku rwego rwo hejuru

Umuyobozi Mukuru wa Polisi y’u Rwanda, CG Félix Namuhoranye aganira n'Umugaba Mukuru w’Ingabo z’u Rwanda, Gen Mubarakh Muganga

Benshi mu bafana bamenyerewe baba bari inyuma ya RG

Ishuri ry’Imyitozo ya Gisirikare rya Nasho bitwaje ibyapa bibaranga

Banyuzamo n'imyiyereko

Minisitiri w’Ingabo, Juvénal Marizamunda yashishikarije abasirikare gukomeza gukora siporo kuko ifasha byinshi mu buzima busanzwe no mu kazi ka buri munsi

Umugaba Mukuru w’Ingabo z’u Rwanda, Gen Mubarakh Muganga, yavuze ko iyi mikino igamije kwimakaza umuco wo gukora siporo no gukorera hamwe

Bamwe mu barinda abayobozi bakuru b’Igihugu bishimira umudali begukanye muri iri rushanwa

Amafoto: Kwizera Remy Moses