Mu ibaruwa Muhire yandikiye Umuyobozi wa Miroplast FC ku ya 24 Gashyantare 2018 yamumenyesheje ko asheshe amazerano yari afitanye n'iyi kipe. Ni ibaruwa ya kabiri yari yanditse nyuma y’iminsi ine asabye ko hakorwa ivugurura ry'imikorere muri Miloplast FC ariko ntihagira igikorwa.

Muhire Hassan yatangaje ko yari amaze amezi abiri abitekerezaho ariko byasembuwe no gutsindwa na Etincelles FC 6-0 mu Gikombe cy’Amahoro 2018 mu mukino wabereye mu Karere ka Rubavu.

Ni icyemezo afashe nyuma y’ibindi bibazo iyi kipe yagiye ihura nabyo mu mwaka wayo wa mbere mu cyiciro cya Mbere birimo kudahemba neza abakinnyi bayo. Mu ntangiriro z’Ukuboza 2017, umucungamutungo wa Miroplast FC yatorokanye amafaranga y’imishahara y'abakinnyi bituma bamara igihe badakora imyitozo.

Mu mikino icyenda, Muhire Hassan yatoje Miloplast FC yatsinze umwe, anganya itanu, atsindwa itatu. Miroplast FC iri ku mwanya wa nyuma muri Shampiyona y’Icyiciro cya Mbere mu Rwanda 2017/2018, ifite amanota umunani mu mikino 10 imaze gukina.